SSA dahngheh tura tihna sorkar kuta hlan a nih hunah zirchian a ni ang - Education Minister

Mizoram SSA Teachers' Association (MSSTA) chuan nimin khan Chanmari YMA Hall-ah General Conference vawi 3-na an hmang a, School Education minister Lalchhandama Ralte in a hmanpui a, Gauhati High Court, Aizawl Bench-in SSA-a thawkte dahnghet tura judgement a chhuah chu sorkar kuta hlan a nih hunah zirchian a nih tur thu a sawi.

Education Minister chuan tunhnaia High Court judgement lo chhuaka MSSTA member-te dahngheh chungchang sawiin, "Certified court judgement hi sorkar kuta hlan a nih hnuah zirchian a ni ang. Court judgement a lo chhuah hma pawhin zirtirtu dahngheh duhtu ka ni sa a, court judgement chuan hmalam hunah thui tak kawngro a sut ka ring. Minister ka nih chhungin Mizorama zirnain hma a sawn theih nan theihtawp ka chhuah ṭhin, hun kal lehzelah pawh theihtawp chhuah ka tum," a ti.

Samagra-a thawkte'n a hun taka hlawh an lâk theih nan Chief Minister, ṭhahnemngaihna zarah state matching share tur cheng nuai 930 vel dah lâwk a nih thu sawiin Lalchhandama Ralte chuan, "Samagra-a thawkte hlawh tihpun a nih theih nana min remtihpuitu Chief Minister leh Council of Minister-te chungah ka lawm hle," a ti a, MSSTA-ten a hun taka hlawh an lâk theih nan ṭan an lak nasat thu a sawi.

Minister chuan zirtirtu chauh ni lo, CSS thawktu dangte pawh huamin hamṭhatna kawng hrang hrang an neih theih nan DPAR-ah rawtna mumal tak siamin buaipui chhoh mek a nih thu sawiin, "Zirtirna hna hi Pathian rawngbawlnaa ngaiin, ṭhahnemngai takin inpekna thuk tak nen hmangaihna nen i thawk ang u," a ti.

Conference-ah hian hruaitu thar thlanna leh pawl inkaihhruaina ennawn a ni a, member thite sûn an ni. An rorel zingah tun hnaia Gauhati High Court, Aizawl Bench-in MSSTA vs Mizoram Education Dept. Court Judgement a tihchhuah chu a hlawhtlin ngei theih nan chak taka hmalak ni rawh se, tih a tel.

MSSTA Gen.Hqrs president atan Rokima Varte, general secretary atan H Ramdinthara leh treasurer atan Lalfakzuali te thlan an ni.