Group YMA-ten khawmpui an hmang

March 22, Ningani leh nimin khan Dampa Group YMA, Ṭawi­tlang Group YMA, Tuisual Group YMA leh Chhimtuipui Group YMA-ten khawmpui an hmang.

Dampa Group YMA chuan khawm­pui hmanpahin, an kum 50 tlin an lawm nghal a, Dampa bialtu MLA Lalrintluanga Sailo-in a hman pui. MLA chuan zirna lamah an bial an hnufual bik loh nan theihtawp an chhuah a ngai tih a sawi.

Ṭawitlang Group YMA pawhin Lungphoah khawmpui hman pahin an kum 50 tlin an lawm nghal a, thupui atan ram leh hnam humhalh tih an hmang.

Khawmpui hmanpuitu minister Lalrinawma chuan YMA chu pawl zahawm leh thiang­hlim, hnam dangte pawhin an hriat a nih thu a sawi.

Chhimtuipui Group YMA chuan khawmpui hi Tipa V-ah an hmang a, a kharna hun hmanpuitu minister Lalruatkima chuan ram leh hnam humhalh turin zirna uar, ruihhlo laka inthiar fihlim leh fa hrin tam chu hmalakna tur pawimawh tak a nih thu a sawi.

Chhimtuipui Group YMA hi kum 1984 aṭangin a ding ṭan a, branch 14 dingin, member 1,300 vel an awm mek a ni.

Tuisual Group YMA chuan N Ṭinghmun khuaah inkhawmpui an hmang a, an hun hmanpuitu minister Lalchhandama Ralte chuan, ṭhalaite chu social media hman danah fimkhur tur leh aia upa zahna nei thar turin a chah.