NGT-in kawngpui laihah dan zawm turin MoRTH leh Mizoram sorkar a hriattir

Kaladan Multi-Modal Transit Transport Project (KMMTTP) kawng laih mek chungchangah National Green Tribunal (NGT) chuan dan zawm ngai zawm tura inchingfel vat turin Ministry of Road Transport & Highways (MoRTH) leh Mizoram sorkar (Chief Secretary) a hriattir.

Vanglaini thudawn danin, KMMTTP kawng laiah hian environment dân zawm loh avangin Centre for Environment Protection (CEP) chuan June 15, 2022 khan NGT-ah thubuai a thehlût a ni.

KMMTTP atan forest clearance (FC) dil niin, a thuphunga pawmpuina (in principle approval) hmuh nimah se, in principle approval-in tih tur a tihte tun thlengin Mizoram PWD-ten an zâwm lo a ni.

NGT chuan forestland hectare 196.75 tihchhiatna atan compensatory afforestation (CA) atan cheng vbc. 2.45 leh net present value (NPV) atan cheng vbc. 14.36 chu Ministry of Environment, Forest and Climate Change (MoEFCC)-a chhunluh a nih a, in principle approval-in tihtur a tihte hlen a nih hma chuan hnathawh lai chu chawl turin Sep-tember 26, 2022 khan order a chhuah a ni.

He thubuai hi ngaih­tuah chhoh zel niin March 20, 2023 khan NGT chuan order chhuah lehin, dân zawm ngai zawm tura in chingfel vat tur leh chumi bawhchhiat a nih chuan na taka ‘action’ lâk a nih tur thu MoRTH leh Mizoram sorkar a hriattir a ni.

NPV leh CA atana sum pêk tur chu thla hnih chhunga chingfel turin a ti bawk.