KHAWTHLIR

Governor-in kawm

Governor Dr Hari Babu Kambhampati chuan nimin khan Raj Bhavan-ah principal accountant general L Hangsing leh a thawhpuite a kawm a, kum khat chhunga Mizoram sorkar sum dinhmun - lakluh, thawhchhuah leh hmanna bakah, hman dan zirchianna State Finances Audit Report (SFAR) 2021-2022 chungchang an sawiho.

Lungphum phum

Champhai district bawrhsap James Lalrinchhana chuan March 22, Nilaini khan NHIDCL hmalaknaa Chhungte khaw ram NH-06 kianga View Point Tower sakna tur lungphum a phum. View Point Tower hi cheng nuai 140 sengin NH06 kawng package III siam mektu Shri Balaji Construction Company in an siam dawn a ni.

Minister-in hawng

Environment, Forests & Climate Change (EFCC) minister TJ Lalnuntluanga chuan nimin khan New Secretariat Complex-ah Chief Wildlife Warden pisa thar a hawng a, March 10-14, 2023 chhunga Tau Devi Lal Sports Complex, Panchkula, Haryana-a All India Forest Sports Meet neih zawh taka Mizoram aiawha kal mi 16 hnenah lawmpuina a hlan. Pisa thar hawn-naah hian EFCC hotute chuan an hmachhawp leh hmalak tawhna te an thlirho nghal a ni.

Ambulance hlan

In chhung lam bungrua siamtu company VGuard Industries Ltd. te chuan an corporate social responsibility aṭangin nimin khan Central YMA hnenah Mizo mipuite'n an hman atan ambulance (Mahindra Supro ZX) an hlan.

Lirthei chesualah mi pakhat a thi

R Lalsangzuala (41) s/o R Rotluanga, Khawzawl Vengthar chu a taxi-in a chesuala, nimin chawhma dar 9:30 vel khan hmuh a ni. R Lalsangzuala hi March 21, Nilaini khan Ṭiauah bungraw la turin a kal a, a haw tâk mai loh avangin a chhungten zawngin nimin chawhma dar 9:30 vel khan Khawzawl aṭanga km. 8 vela hlaah kawngthlangah a taxi nen thia hmuh a ni. Kawngthlang ft. 200 velah an lum.