Lunglei khawpui tan thuneihna insemzai a pawimawh - Lalsawta

Lunglei Municipal Council (LMC) inthlan tura inbuatsaihna atan MPCC chuan nimin khan Zotlang leh Serkawn kawtthlerah vantlang inkhawm an buatsaih a, MPCC president Lalsawta chuan Lunglei khawpui tan thuneihna insemzai a pawimawh thu a sawi.

Lalsawta chuan Lunglei khawpui chu khawpui pawimawh tak ni mah se, rualawhna tam tak a la awm tih sawiin, "Chuvangin, Lunglei khawpui tan thuneihna in semzai a pawimawh. Hemi tur hian LMC-ah sorkarna kan chan chuan hma kan la ang," a ti.

MPCC President chuan Lungleiin municipal council a neih dawn takah chuan mi harsa zawkte innghahna NREGS a bo dawn tih sawiin, "MLA inthlanah sorkarna kan siam chuan municipal area chhunga cheng mi harsate inhlawhna tur Urban Employment Guarantee Scheme kan buatsaih dawn," a ti a, mi harsate tan Congress party a din dawn thu a sawi.

Old pension scheme kalpui an tum chungchangah Lalsawta chuan, "Mizoram hi pension fund vangin a buai ngai lo, corruption hi a ni kan buaina tak tak zawk chu. Kum 30 kaltate ngaihtuah chuan nasa takin hma kan sawn tawh, mahse, kan beisei ram kan la thleng lo. He ram hian kan beisei ang dinhmun a thlen hma loh chuan Congress party chuan Mizoram tan theihtawp a chhuah zel dawn a ni," a ti.

He hun hi LDCC president Chhawn-zauva'n a kaihruai a, Rev. Lalruatdika Pautu in hunserh a hmang.

Ward No.I candidate Lalhlimzauva leh Ward No.II candidate Lalramzauvi Chawngthu te'n thu an sawi bawk.