ASF vangin DC-ten thupek an chhuah

Lunglei district bawrhsap Ramdinliani chuan thupek chhuahin, vawk pûl hri, African Swine Fever (ASF) vanga Lunglei district-a vawk leh vawksaa inkhuahkhirhna hman mek chu a thlahdul a, vawk tana hri hlauhawm a lên mai loh nan vantlang kawng leh ram hrulah vawk talh leh sawngbawl khap a nih thu a tarlang.

Bawrhsap chuan, Lunglei district-a ASF hri len lohna khua/ vengte inkarah vawk leh vawksa inlâk tawn theih a nih thu leh ASF hri len lohna district dang aṭang chauhin vawk leh vawksa lakluh theih a nih thu te, ASF hri vanga infected area-a puan tawhnaah thla khat chhung ASF vanga vawk thi a awm tawh loh chuan vawk talh leh a sa zawrh phal a nih thu tarlangin, "ASF vanga vawk thite awmna in/hmun/farm ngun taka disinfectant hmanga sawngbawla tihfai tawhna hmun chu thla thum ral hnuah vawk dah luh theih a ni a, vawk tana hri hlauhawm a lên mai loh nan vantlang kawng leh ram hrulah vawk talh leh sawngbawl phal a ni lo," a ti.

Chhan leh vang hriat loa vawk thi chu VC/YMA kaltlangin AH&Vety de-partment hotute hnenah hriattir vat tur leh paih mai loa chinai nen thuk taka phum turin district mipui a chah bawk.

Champhai district magistrate James Lalrinchhana chuan vawk pûl hri, African Swine Fever (ASF) laka Champhai district a him nan khuahkhirhna a tichhuak a, ram dang leh state dang aṭanga vawk, vawksa leh vawksa aṭanga siamte lakluh khap a nih thu te, vawk thi leh damlo an awmin AH&Vety department hotute hriattir vat tur a nih thute a tarlang.