Kolasib MZP khawmpui a ṭiak

March 22, Nilaini zan khan Mizo Zirlai Pawl Headquarters, Kolasib chuan Buhchangphai Community Hall-ah Conference 2023 kharna hun an hmang a, minister K Lalrinliana, Kolasib bialtu leh Tuirial bialtu MLA K Laldawnglianate'n an hmanpui.

K Lalrinliana chuan, MZP chu sorkar kal sual tur venna leh khalh ngiltu hmanraw pawimawh tak an nih thu a sawi a, "MZP dinchhan pawimawh tak chu zirna tih hmasawn bakah kut hnathawh chawisan a ni a, nasa lehzuala kalpui a ṭul," a ti a; kut hnathawh zahpui lo tur te, tui hna humhalhna tura thing phun uar tur te, faina leh thianghlimna kawnga khawtlang nuam siam tura hmahruaitu nih tum turin kalkhawmte a chah.

K Laldawngliana pawhin thu sawiin, MZP chu zirlaite hamṭhatna humhalh sak tura pawl din ni mahse ram leh hnam hmangaihna inzirtirna hmun pawimawh a nih tel a ṭul thu a sawi a; Kawnpui MZP Sub-Headquarters leh School of Nursing, Thingdawl tan computer a ruahman sak tur thu a sawi bawk.

Conference-ah hian Kolasib district-a zirna tih hmasawnna tura hmalak te, commerce subject zirna bulṭan a nih theih nana hmalak leh Kolasib district-a hnamdang dan loa awm dap-chhuahte an rêl a ni.