Lunglei by-pass road ṭha zawka siamna tur PM-DevINE hnuaiah thehluh a ni tawh - MNYF

Mizo National Youth Front (MNYF) chuan thuchhuah siamin, MNF sorkarin Lunglei by pass road, double lane ṭha zawka siamna tur project PM-DevINE scheme hnuaiah a thehlut fel tawh niin an tarlang.

MNYF chuan Mizoram Budget Session March 15, 2018 a neihah Congress party chuanNovember, 2018-a MLA inthlanpui neih turah Lunglei leh chhim lam mipui rilru kawihher theihna a nih beiseiin Lunglei by pass road siamna atan a hming lekin special NEDP scheme an vuahchawp hnuaiah cheng vbc. 10 dah turin a thuin ruahmanna a siam nia tarlangin, "A taka sum hmuh chu vbc. 9 chiah a lo ni leh si a ni," an ti.

Congress sorkarin cheng vbc. 9 a dah chu politics hmanga mipui rilru hruaikawi tumna mai a nia tarlangin MNYF chuan, "Lunglei by pass road, double lane kawng siamna tura hman tham a ni lo hrim hrim a ni," an ti a, MNF sorkar chuan Lunglei leh chhim lam mipuite'n hmasawnna rotling leh ṭhazawk an neih theih nan PM-DevINE hnuaiah Lunglei by pass road siamna atan cheng vbc. 303.6 sênna tur project a thehlut fel tawh niin an tarlang.

MNYF chuan Lunglei by pass road siamna tur hi kum 2023-24 ah a hlawhtlinna hmel hmuh hman a nih ngei an beisei thu tarlangin, "Union Cabinet meeting-in a lo pawm tawh PM-DevINE hnuaiah hian kum 4 chhung atan cheng vbc. 6,600 chu hmarchhak bial bik hmasawnna tura dah a ni. Hemi hnuaiah hian CM hmalaknain Mizoram chuan Aizawl By-pass road siamna tur cheng vbc. 500 leh bamboo link road laihna turin cheng vbc. 100 a lo hmu tawh a ni. Lunglei by-pass road siamna tur cheng vbc. 303.6 pawh Mizoram chuan a hmu leh ngei tura ngaih a ni," an ti.