Dy. CM-in City Centre sakna tur lungphum phum

Deputy chief minister Tawnluia chuan nimin khan New Market hmuna City Centre sakna tur lungphum a phum. Dy. CM chuan, Bara Bazar-a ṭhu ṭhinte an len vek theih nan project atana sum dah cheng vbc 34 chu vbc 41.59-ah tihpun a nih thu a sawi.

Dawrpui Multipurpose Hall-a City Centre sakna tur lungphum phumna inkhawmah thusawiin Tawnluia chuan, "City Centre lungphumna neih a ni ta hi hmasawnna leh changkanna rahbi thar, Aizawl khawpui cheitu tur ruhrel pawimawh tak a ni," a ti.

Tawnluia chuan, City Centre chu tlawh chakawm tak a nih dawn thu a sawi a, "Mizoram tana hmun pawimawh leh ṭangkai tak a nih ka beisei. Mizoram sorkarin uluk taka a ngaihtuah hnuah Bara Bazar-a ṭhu ṭhinte an len vek theihna turin he project atana sum dah cheng vbc 34 chu vbc 41.59-ah tihpun a ni a, Bara Bazar-a ṭhu ṭhinte nena inbiakna neih a nih hnuah pawisa dah pawh tihpun a ni," a ti a, project hlawhtlinna tur leh sakzawh a nih huna enkawl kawngah theihtawp chhuah zel turin Dawrpui Local Council, NGO leh veng mipuite a sawm.

He huna tarlan danin, City Centre-ah hian cold storage, CCTV, services lift, office, food court, conference hall, ATM booth leh thil ṭul dangte a awm dawn a ni.