Robert Romawia bàn tura ngen chungchangah Election Commission-in thu an la nei lo

ZPM party-in MLA aṭanga Robert Romawia Royte bàn tura ngenna an thlen chungchangah Election Commission of India (ECI) chuan thu an la nei lo.

Tarlan tawh angin, ZPM chuan an Vigilance dept. general secretary SL Ngursailova Sailo hmingin February 28, 2023 khan Governor hnenah lehkha an thehlut a, Robert Romawia chu Representation of the People Act, 1951 (RP Act) Section 9(A) bawhchhiaah puhin MLA aṭanga ban turin an ngen a ni.

Secretary to Governor V Lalsangliana chuan March 16, 2023 khan ECI principal secretary SB Joshi hnenah lehkha thawnin, ZPM-in Robert Romawia Royte bàn tura a ngennate chu thawn chhâwng an nih thu leh, lo zir chiang a, an ngaihdante Governor rawn hrilh leh turin a ti.

Vanglaini thudawn danin, ECI chuan Governor hnenah hian an ngaihdan an la rawn hriattir lo a ni. An rawn hriattir hunah Governor chuan zirchiang­in thutlukna a siam ang.

Robert Romawia leh SL Ngursailova Sailo pawh ECI lam chuan engmah an la rawn hriattir lo. Vanglaini palai zawhna chhangin Robert Romawia chuan Lungleiah a awm mek thu sawiin, "ECI aṭanga thu dawn ka neih ka hre lo," a ti.

Robert Romawia chuan, tih dan phung pangngaiin ZPM ngenna chu ECI-ah thawn a nih hmel tih Vanglaini a lo hrilh tawh a, "Ṭul an tih chuan ECI chuan ka comment-te pawh an rawn dil ve mai thei e. Pathian zarah dan bawhchhiat ka nei lo a, MLA aṭanga bàn ngawt theih ka ni lo," a ti a; thu dik a lang mai tura a ngaih thu a sawi.

SL Ngursailova Sailo pawhin ECI aṭanga thudawn a la neih loh thu Vanglaini palai zawhna chhangin a sawi a, "Document kan nei ṭha tawk a, ECI lam pawhin thutlukna an neih thuai ka beisei. ECI-in an hmuh dan an thlen hunah Governor-in a ban ngeiin ka ring," a ti.