Nasa takin kan danglam tawh - Lalsawta

MPCC chuan nimin khan Lunglei Municipal Council (LMC) inthlan lo awm tur pualin Zohnuaiah street campaign an buatsaih a, MPCC president Lalsawta chuan an party chu nasa taka an danglam tawh thu a sawi.

Lalsawt chuan Congress party-in tharna neih an tum tih sawiin, "Rilru thar, ngaihtuahna thar leh duh zawng thar kan nei. Nasa takin kan danglam tawh. Ṭha lehzuala ram leh mipui rawng kan bawl theih nan Pathianin hun remchang min pek ngei pawh kan beisei a ni," a ti.

Lunglei chu ram hruaitu ropui tak tak te, mithiam leh ziak mi, zai mi ropui tak takte lo pianchhuahna a ni a nih thu sawiin MPCC President chuan, "Chuvangin, vawiin thleng hian Lunglei khawpui hi kan ngai ropui em em a ni," a ti a, hun inher zelah Lunglei khawpuiin a ropuinate a hloh ve hret hret thu a sawi.

Chhimbial Chhantu hial din a ngaih tak thu sawiin Lalsawta chuan, "Hetiang kara Lunglei khawpuiin amah enkawltu tur bik Lunglei Municipal Council a nei tur hi a lawmawm ka ti. Lunglei khawpui tihhmasawnna atana ruahmanna kan lo siam vete pawh tih hlawhtlin a awlsam lehzual dawn niin kan hria," a ti.

MPCC President chuan, Lunglei khawpuiin a hlutna a neih let leh theih nan Congress party candidate mi 11-te vote hram turin Lunglei mipuite a sawm.

Thusawitu dang, Congress MLA Lalrindika Ralte chuan politics chu thil tak tak a nih thu sawiin, "Politics buaipuitute pawhin thil tak tak kan buaipui a ni tih hria a, tih tak takna nena kan buaipui a ngai," a ti.

Politics chu ram leh mipui bakah Pathian rawngbawlna a nih avangin thianghlim takin khelh tur a nih thu sawiin Lalrindika Ralte chuan, Lalsawta kaihhruai Congress party candidate-te vote turin Lunglei mipuite a ngen.