MNF sr. vice president Tawnluia'n an candidate-te Vote turin Lunglei mipui a sawm

MNF sr. vice president Tawnluia, dy. chief minister chuan nimin khan Lungleia an party pisa-ah thuthar thehdarhtute kawmin, Lunglei Municipal Council (LMC) inthlanah an party candidate-te vote turin Lunglei mipuite a sawm.

Tawnluia chuan MNF party-in Lunglei mipuite tan theihtawp a lo chhuah tawh ṭhin tih sawiin, "Lunglei khawpuiin hmasawnna lamtluang a zawh zel theihna atan LMC inthlan lo awm turah hian MNF candidate-te vote ṭheuh turin thinlung takin Lunglei mipuite ka sawm a ni," a ti.

Mipui aiawhte hnena thuneihna sem zai MNF sorkar chuan a duh tih sawiin MNF Sr. Vice President chuan, "Chumi tur chuan kawng hrang hrangin hma a la a ni," a ti a, mipuiten thuneihna sang zawk an neih theih nan Lungleiah pawh LMC office hawn fel a nih thu a sawi.

MNF Sr. Vice President chuan furpui avang leh chhan dang avangin duh angin Lunglei kawng an siam chak tawk lo tih sawiin, "Theihtawp chhuah mek zel a ni a, furpui hma chuan kan siam zo turah kan ngai a ni," a ti.

Lunglei by-pass road siamna atan Congress sorkarin an tlak dawn hnaiah a hming maia pawisa an dah thu sawiin Tawnluia chuan, "A beitham lutuk avangin Lunglei tan tho thilah hman a ni," a ti a, Lunglei by-pass road atan cheng vbc. 300 vel ruahman thar a nih thu a sawi.

Tawnluia sawi danin, Lunglei by-pass road atan hian NHIDCL hnenah tender pek niin an ni'n sum an zawng a, Ministry of Road Transport & Highway (MoRTH) chuan DPR siam tur tender a chhuah tawh.

A hmaa Congress sum dahah chuan compensation-a ram lakna tur pawh awm lo, km. 4 vel chauha thui siamna daih a ni. Tuna MNF ruahman chu km. 22-a thui ram lakna turte pawh daih vek a ni. MNF chuan vote zawn nan mai an ti ve lo a, Lunglei mipui hian kawng ṭha leh by-pass road ṭha an neih chu thinlung takin an duhsak a ni.

MNF Sr. Vice President chuan ZPM chungchang sawiin, "An zawrh mek kalphung thar hi a chhiat leh a ṭhat a hriat lawk loh. Thil thar chhia hi tumahin kan duh chuang lo. Tuna sorkar kalpui mek 'kalphung ṭha' hi mipuiin vote tlin leh an tum niin kan hria a, kan lawm hle," a ti.

Tawnluia chuan Congress party chu phai lama an chhiat ang bawkin Mizoramah an hniam em em nia sawiin, "Covid hripui avangin MNF sorkar hi duhthusam zan chuan kal lo mah ila mipuite hian sorkar leh turin MNF hi min duhin min ring niin kan hria," a ti a, mipui chungah an lawm thu a sawi.