ZPM-in candidate-te party behchhan zir chiang turin mipuite sawm

Nimin khan Lunglei Press Club-ah ZPM corpo-rator Baryl Vanneihsangi leh footballer hlui Jeje Lalpekhluate chuan thuthar thehdarhtute an kawm. Baryl-i chuan Lunglei Municipal Council (LMC) inthlana candidate-te party behchhan zirchiang turin Lunglei mipui a sawm.

Baryl Vanneihsangi chuan party bil politics ni lo, ram leh hnam politics buaipuitutenLMC-ah a fawng an chelh loh chuan hmasawnna a rualkhai dawn lo nia sawiin, "Chumi hrechiangtu leh tawngtu ka ni. Leitlangpui tana in duhthusam hmasawnna te, mipui huapzo LMC sorkar in piantir a pawimawh tak zet a ni," a ti.

Party politics-a inchhum hmin tawhten sorkarna an siam chuan mi tlemte chauh hamṭhatna a ni dawn nia sawiin Baryl Vanneihsangi chuan, inthlan lo awm turah hian party tin candidate-te an party behchhan leh an dinchhan zirchiang a, chumi hnuah rilru leh ngaihtuahna fim tak hmanga vote thlak turin mipuite a ngen. 

ZPM Corporator chuan LMC inthlanna neih turah hian ṭhalaiten ke an pen nasa tih sawiin, "Chutihlaiin, nu leh paten kut in lo kuangkuah mai ang tih ka hlau. Nu leh pate, upate tawnhriat ngah tak tak in ni," a ti a, ṭhalaiten nu leh pate thurawn an mamawh thu a sawi.

Jeje Lalpekhlua chuan inkhel mi a nih thu sawiin, "Kan inkhelh lai pawhin mahni theih ang angin ram hi kan vei ve ṭhin a ni," a ti.

Tunlai Mizoram politics boruak leh Mizoram dinhmun en chuan politician tam tak hian Mizoram tan aiin, anmahni pumpui tan politics-ah an lut nia a lan thu sawiin Jeje Lalpekhlua chuan, "Hei hian nasa takin keipawh hi min pawt kal ve a ni," a ti a, ṭhalaite khawvel a nih tawh avangin ṭhalaite penchhuah a ngaih thu a sawi.

Jeje Lalpekhlua chuan ṭhalaite'n change an thlentir a ngaih thu sawiin, "Kum upa lamte kuta dah mai loin ṭhalai lam hian hma kan lak a ngai tawh a ni. Kum lama upa leh kan hruaitu hmasate pawhin thil ṭha tam tak an lo ti tawh ṭhin a, kan zah em em a ni," a ti a, Lunglei mipuite rilru zau tak pua vote thlak turin a sawm.