Myanmar-ah Mizoram mi 3 an tualthi; Mizoram police-in an chhui zui mek

New Siaha mi pahnih C Biaksuii (Suitei Chinzah) (kum 48) leh Bablu Talukdar (37)-te leh B Lalṭhafamkima (kum 22 vel), Lungpher, Lawngtlai district-te chu March 22, Nilaini zan khan Mizoram leh Myanmar inrina bul, Myanmar ram chhungah thia chhar an ni a, an kâng chhe hle. Police-in an chhui zui mek.

Mi pathumte ruang laknaa kal ve MTP hruaitute sawi danin, Suitei leh Bablu Talukdar te chu March 19, 2023 (Pathianni) zing dar 4 vel khan Siaha aṭangin mi pakhatin a hruai chhuak a, a hruai chhuaktu hi an hmelhriat ṭha tak a ni. B Lalṭhafamkima khalh TATA Ace hmangin ramri lam an pan a, zing dar 7:30 velah ramri bula khua Ainak, Lawngtlai district an thleng.

Ainak khuaah hian Myanmar lam aṭanga kal damlo hruai tur anga insawiin ramri lam an pan a, chuta ṭang chuan an chanchin hriat zui a ni ta lo a ni.

March 19 tlai lam aṭangin an chhung­te'n an ngaihven ṭan a, March 22, Nilaini zan khan Suitei Chinzah leh B Lalṭha­famkimate chu thiin hmuh an ni a, a hnuah an awmna atanga metre 50 velah Bablu Talukdar pawh thiin hmuh ve leh a ni.

Mi pathumte ruang la turin Ainak, Lungpher leh Siaha aṭangin kuang siam sa kengin mi eng emaw zat an kal a, March 23, Ningani zing dar 9:30 velah ruang chu lak a ni. Tlai lamah Siaha thlenpui a ni a, Siaha District Hospital-a endik (postmortem) an nih hnuah zanah an khua ve veah vui an ni.

MTP hruaitute chuan, mitthite hruai chhuaktute chu Myanmar lama hel pawl nia an ngaih thu an sawi. Suitei Chinzah chu Myanmar lama hel pawl ṭhenkhatte nen ralthuam lei leh inpekah an inthurual ṭhin nia sawi chungchanga zawhna chhangin, "Sawi chu a awm a, mahse, finfiahna kan neih loh avangin an inthurual ṭhin e, tia sawi theih a ni lo," an ti.

MTP hruaitute chuan, mi pathumte hàl an nih hmain an that tawh nia rin a nih thu sawi chungchangah, postmortem result a la chhuah loh avangin hriat chian theih a la nih loh thu an sawi a; Suitei Chinzah chu Myanmar aṭanga pém lut ni mahse Siahaa an awmna a rei tawh thu leh Bablu Talukdar pawh Siahaah a awm rei tawh thu an sawi bawk.

Thil thleng chung-changah hian police-in thubuai an ziak lut a, an chhui zui mek a ni.