KHAWTHLIR

Study centre din remti

Lunglei District Level Adhoc Managing Committee for Saikuti Hall chu nimin khan an chairman Ramdinliani, bawrhsap kaihhruaiin DC conference hall-ah an ṭhu a; NIELIT, Lunglei in Saikuti Hall-a study centre din an dilna chu pawmin, 'Hall hmangtu dangte tana hnawksak lo tura hmun rem ngaihtuah ni se' an ti. Saikuti Hall leh Circuit House chei tharna atan PWD hotute chu NEC leh SASCI-a project thehluh tur siam fel thuai turin hriattir an ni.

MLA-in bus pe

Hachhek bialtu MLA Lalrindika Ralte chuan March 23, Ningani khan a bial chhunga mi Zawlnuam College tan MLA fund aṭanga a lei bus a pe. Lalrindika Ralte chuan MLA fund chu a bial mipui leh ṭhalaite tana ṭangkai thei ang bera hman zel a duh thu a sawi.

Lungphum phum

Deputy chief minister Tawnluia chuan March 23, Ningani khan Hlimen YMA Hall-ah Hlimen playground sakna tur lungphum a phum. Hlimen playground-a khelmual tur hi 90mx45m a zau tur a ni a, Aizawl Smart City hnuaiah cheng nuai 681 senga sak tur a ni. Deputy CM hi bialtu MLA Prof. F Lalnunmawia'n a ṭawiawm a ni.

Thawhho ṭha ti

Minister R Lalzirliana hoin March 23, Ningani khan a bial chhung Saitualah sorkar hotute leh joint VC leh kohhran hruaitute an ṭhukhawm a, kum 2026-a Saitual khawpuia Central KṬP General Conference nghah tur chu tluang taka hman a nih theih nan leh hmasawnna a thlen zel theih nan thawhhona ṭha neih a pawimawh thu an sawi.

Sipai uniform ang neih phal lo

Serchhip district bawrhsap Nazuk Kumar chuan Indian Army-ten Combat Uniform design thar an neih chu mipui nawlpui lei leh thui ve phal a nih loh thu a tarlang a, "Indian Army-te chauh hman theih tura patent a nih avangin he uniform design thar ang hi midangin entawna siam phal a ni lo," a ti.

DFDO pisa hawng

Fisheries minister K Lalrinliana chuan nimin khan Khawzawl Darngawn Vengah District Fisheries Development Officer (DFDO) pisa tur a hawng. Khawzawl DFDO pisa hi Khawzawl DC Office Complex-ah in luahin an awm lailâwk phawt dawn a, thawktu paliin an ṭhutchilh ang.

Water security

MZU-a Mizoram Sustainable Development Foundation-in Department of Environmental Science leh Department of Biotechnology ṭangkawp buatsaihin nimin khan MZU Administrative conference hall ah ‘Water Security in Mizoram’ tih thupui hmangin thu sawihona (roundtable discussion) neih a ni.

Workshop hawng

Health and Family Welfare (HFW) principal director Dr C Lalzepuii chuan nimin khan Mizoram University-a Education department seminar hall-ah ‘Nation-wide Campaign on Ashwagandha & State Level One-Day Workshop’ a hawng. Workshop-ah hian India rama ramhmul damdawi ngaihhlut berte zinga mi, Ashwagandha (withania somnifera), ‘Indian Ginseng’/ ‘Winter Cherry’ tia hriat chungchang zirho a ni.