Kum 8 chhungin kum tin TB vei enkawl dam 85% a tling ziah

Nimin kha World TB Day a ni a, khawvel hmun dang rualin Mizoram hmun hrang hrangah pawh hman a ni. Kumin Day thupui chu 'Yes! We can end TB!' tih a ni.

World TB Day hi Aizawlah chuan Governor Hari Babu Kambhampati hoin Assembly Annexe conference hall-ah hman a ni a; Mizoramah kum 2015 aṭang khan TB vei enkawl dam chu kum tin 85% chunglam a la ni zel tih tarlan a ni.

Governor Hari Babu Kam-bhampati chuan TB natna veite inenkawlna atana chawṭha (nutrition) thawhtute hnenah chawimawina a hlan a; thu sawiin, "Kum 2030-ah khawvelah TB natna nuaibo tumin khawvel ram zawng zawngin intiam-kamna an nei a, hetih lai hian Prime Minister kaihhruaina hnuaiah India ramah kum 2025 ral hmain TB natna tih rêm kan tum," a ti.

TB natna umbo tura PM-TB Mukt Bharat Abhiyaan hmalakna sawiin Larsap chuan, "He hmalakna hi a danglam hle a, sorkar leh khua leh tui zawng zawngte thawhhona niin, sorkar aṭanga TB natna vei enkawlnate chu mi ṭhahnemngai leh mi thilphalte'n thilpek hmanga an thlâwp theihna tur 'Nikshay Mitra program' chhawp chhuah a ni," a ti a, TB veite tana chawṭha thawh turin mi tin a sawm.

Larsap chuan Health department-in TB natna umbo tura theihtawp a chhuah chu chhuanawm a tih thu leh kum 2025 ral hmaa TB natna awm lohna state ni thei tur leh ni hmasa ber turin duhsakna a hlan a, "Hei hi tihhlawhtlin a nih chuan natna khirh AIDS, cancer, etc. huanga hmalaknate pawh a chak sawtin ka ring," a ti bawk.

He huna tarlan danin, kum 2022 statistics-ah chuan Mizoramah TB vei 2,081 hmuh chhuah a ni a, TB natna veitute hi enkawl dam ni tlangpuiin, TB enkawlna dawngtute hlawhtlinna hi kum 2015 aṭang khan 85% chunglam a ni zel a, kum 2022 khan 87% a tling.

TB vei zingah multi-drug resistance (MDR) case 117 enkawl mek a ni a, kum 2022 khan MDR case enkawl zinga 73% a hlawhtling. TB thihpuitu zat erawh kum 2015-2022 chhungin tlem lam a la pan meuh lo a, kum 2022 khan TB vangin mi 74 an thi a ni.

World TB Day pual hian nimin chawhmaah khan Varanasi khawpuiah khawvel pum huap intawhkhawmna - One World TB Summit neih a ni a, prime minister Narendra Modi chuan TB natna umbo kawnga hmalakna pawimawh tak tak a hawng. He hunah hian Governor Hari Babu Kambhampati pawh video conference kaltlangin a tel ve a ni.