Mimala sum duh leh sum ît lutukte hi tih loh tawp tur a ni - R Lalzirliana

Minister R Lalzirliana chuan March 23, Ningani khan a bial chhung Saitualah District Fishe-ries Development Officer (DFDO) pisa thar a hawng a, "Mipui rawngbawltu kan ni tih kan inhriat a pawimawh a, chuvang chuan mimala sum duh leh sum ît lutukte hi tih loh tawp tur a ni," a ti.

R Lalzirliana chuan, Saitual district chuan hun rei lote chhungin hma a sawn nasa hle tih a sawi a, "Inkalpawhna kawng ṭha leh awlsam zawk te, tui supply hnianghnar zawkte mipui hman theih turin a awm chho zel. Sorkar hnathawk leh khawtlang hruaitute hi mipui rawngbawltu kan ni," a ti a, thil dik lo titu chu danin a pension hnu thleng pawhin a umzui ṭhin tih a sawi.

Fisheries minister K Lalrinliana pawhin thu sawiin, "Mizorama kan lui liante kan humhalh chuan lui lam saah intodelhna tham kan thar thei. Sangha hi uluk taka enkawla chaw ṭha taka pek an nih chuan an ṭhang duh hle a, sum thawhchhuah kawngah vawk leh bawng vulh aia a hlawk lohna tur a awm chuang lo," a ti a, ei leh bara intodelhna chi khat a nih theih thu a sawi

Pisa hawnna inkhawm hi Fisheries secretary Laldawngliana'n a kaihruai a, Fisheries director F Vanlallawma leh Saitual DC VL Hruaizela Khiangte tepawhin thu an sawi.