In 14,134-ah tui connection pek a ni tawh

Lawngtlai District Water & Sanitation Mission (DWSM) chu nimin khan an chairman David Lalthantluanga, bawrhsap hoin DC conference hall-ah an ṭhukhawm a; Lawngtlai WATSAN Division hnuaia khaw 158-a chhungkaw 23,314 hnena in tina tui connection pek turah in 14,134 (61%) pek fel a nih tawh thu tarlan a ni.

Ṭhutkhawma tarlan danin, Jal Jeevan Mission (JJM) hnuaia kum 2024 hma ngeia thingtlang in tina tui connection (Functional Household Tap Connection) pek kim turah kum 2019-20 aṭang khan Lawngtlai WATSAN Division chhunga khaw 158-a chhungkaw 23,314-ah hmalak a ni a, in 14,134 (61%) chu pek fel tawh niin, hmalak 9,180 a la awm.

NABARD hnuaia RIDF aṭanga hmuh cheng nuai 900 hmanga mi 25,196 chawm thei tur Chawngte Rural Drinking Water Supply Scheme (pumping) siam hna chu 40% zawh a ni tawh a; Special Central Assistance to States for Capital Investment (SASCI) aṭanga 3rd IR Battalion Thingkah leh Thingkah khaw chhung tana tui pekna tur (water supply) siam hna pawh 85% zawh a ni tawh.

Lawngtlai khawpui chawmtu tui lâkna, Greater Lawngtlai Water Supply Scheme tihchangtlunna tur DPR chu Urban Ministry in a pawm tawh a; he project-ah hian Lawngtlai khawpuia tui sem darhna tur te, Chhimtuipuia standby submersible pump dahna tur te, treatment plant tihchangtlunna tur leh Ṭawngṭai Tlanga litre nuai 1.5 dawng zonal tanky siamna turte a tel a ni.