Bairabi - Sairang inkar rel kawng siam zawh hun tur a la hriat loh

Nimin Parliament Budget Session-ah Rajya Sabha MP K Vanlalvena zawhna chhangin Union Minister for Railways Ashwini Vaishnaw chuan Bairabi - Sairang inkar rel kawng siam mek chu zawh a nih hun tur hriat theih a nih loh thu Parliament House a hrilh.

Union Minister chuan Bairabi - Sairang rel kawng siam nan cheng vbc. 5,021.45 sanctioned a ni tawh tih sawiin, "Cheng vbc. 7000 senga he hna hi zawh theih beisei a ni. Tun dinhmunah chuan hnathawh zawh hun tur chhan hrang hrang vangin sawi chian theih a la ni lo," a ti.

K Vanlalvena zawhna Ashwini Vaishnaw-in a chhan danin, Bairabi leh Sairang inkar rel kawng siam nan sorkar kum thar 2023-2024 ah cheng vbc. 915 ruahman belh a ni.

Sihhmui aṭanga Mizoram chhim tawp Zorinpui thlenga rel kawng siam tumna a awm leh awm loh zawhna chhangin Railways Minister chuan, "Rel kawng siam hna hi a ṭul dan azir leh mamawhna leh kawng hrang hranga a ṭangkai dan tur thlir chunga siam ṭhin a ni. Tun dinhmunah chuan Sihhmui - Zorinpui Rel kawng siam tumna a awm rih lo," a ti.