AR insawn a takin a lo thleng ta - MNF

Mizo National Front (MNF) party chuan thuchhuah siamin, Aizawl khawpui aṭanga Assam Rifle insawnchhuah chu a takin a lo thleng chho ta tih an tarlang a, "Mutmawh hnarmawha neitu kan Chief Minister tumruhna leh ṭhahnemngaihna hi Mizo mipui tan a chhuanawm tak zet. Hmathlir thui tak nei, kan CM leh MNF President ni bawk hi Mizoram tan rohlu berte zing a mi a ni," an ti.

MNF chuan Assam Rifle-te insawn chhuak tur chu Aizawl khawpui leh Mizoram tan mellung pawimawh tak a ni reng dawn tih an tarlang a, "Ṭhenkhatte'n ring lo a, deuhsawhna chitin reng nena beih a nih lai pawhin chief minister Pu Zoramthanga hian a tum a ṭhulh chuang loa, chawl loin a hma-lakna kalpui zelin, central lama thuneitute a dawr reng a ni," an ti a, a hlawhtlinna ruangam a lo lan tak thu an tarlang.

Assam Rifle-in an hmun an chhuahsan tur chungchangah mimal thil tithei leh sorkara hamṭhatna dawng thei chinte insem ral leh neih mai mai tura ngai an awm thu tarlangin MNF chuan, "Buan a hmain nasa takin an lo kherh tawh. Mipui punkhawmna lian tham a awm theihna turin Mizo hnam pa, Pu Laldenga hriatreng nan 'Laldenga Convention Center' ropui tak din a ni dawn. April 1, 2023 hian Union Home minister Amit Shah-a'n a lungphum a rawn phum ang," an ti.