Lunglei Municipal Council inthlanpuia campaign hun vawiinah a tàwp dawn

Lunglei Municipal Council (LMC) inthlanpui hmasa ber March 29, 2023-a neih turah political party-te leh candidate-te campaign-in a vàwrtàwp a thleng mek a, campaign hun hi vawiin tlai dar 4-ah a tàwp dawn. Inthlan buaipuitute ngawrh takin an inpuahchah mek.

LMC inthlan tura inbuat­saihna kal zelah March 25, Inrinni khan Lunglei DC indoor stadium-ah vote thlâkna tur electronic voting machine (EVM) chinfel hna thawh a ni a; municipal election officer leh bawrhsap Ramdinliani, retur­ning officer Donny Lalruat­sanga, election observer Dr Lalngura Tlau, election officer C Lalduh­zuali leh official dangte bakah, political party aiawhte an tel.

Polling station tina hman tur EVM control unit leh ballot unit thlan tawhte chu inthlan nía hman mai theih tawh turin buatsaih a ni a; EVM khawl buatsaihna hun hi a siamtu Bharat Electronics Limited engineer pahnihin an enpui a ni.

Municipal election officer Ramdinliani hian Inrinni vêk khan Lunglei khawpuia polling station ṭhenkhat a tlawh bawk a, inthlan atana inbuatsaihnate a enfiah.

LMC inthlanpui atana cam­paign-in a vàwrtàwp a thleng mek a, vawiin chiah campaign-na hun a awm tawh avangin political party hruaitu te, candidate-te leh anmahni puitu campaigner-te'n theihtawp an chhuah mek.

Campaign hun hi vawiin March 27 tlai dar 4-ah a tàwp tawh dawn a, tlai dar 4 hnu lamah chuan campaign phal a ni dawn lo. Party thil leh campaign tura Lungleia awm, Lungleia vote nei lo leh khawpui páwn lam mite chu LMC area chhuahsan vek turin State Election Commission chuan a lo hriattir lâwk tawh a ni.

Tarlan tawh angin, LMC inthlan turah hian candidate 42 an awm a; INC, MNF leh ZPM-te'n bial tin (ward 11)-ah candidate an dah a, BJP-in ward pakuaah candidate an dah thung. March 29, Nilaini zing dar 7 aṭanga tlai dar 4 thleng vote thlâk hun hawn a ni dawn a, vote tlate chu April 3, 2023-ah chhiar a ni ang.