BAO dah lêt tura Mizoram sorkar kar nan N Vanlaiphai-ah total bandh kalpui dawn

North Vanlaiphai aṭanga East Lungdar khuaa Block Agriculture Office (BAO) sawn duh lohna lantir nan March 28, naktuk hian N Vanlaiphaiah total bandh kalpui a ni dawn. BAO chungchanga an hmalakna kal zelah N Vanlaiphai VC-te chuan thuneitute hnenah VC seal an pe kîr tawh nia thu dawn a ni.

N Vanlaiphai JAC chuan an khuaah BAO dah lêt turin Chief Minister hnenah March 8, 2023 khan lehkha an thehlut a, March 17, 2023 ral hmaa tihlawhtling turin an phût a ni. An hun tiam a liam hnuah pawh thu lawmawm hriat tur a awm loh avangin JAC chuan an kal zel dan tur an rél a, March 28-ah total bandh huaihawt an rél ta a ni.

Total bandh hi zing dar 6 aṭanga tlai dar 5 thleng kalpui a ni dawn a, bandh chhungin pawnah chhuahvah phal a ni lo. Dawr leh sumdawnna hmun, zirna-in leh sorkar pisate khàr vek tur a ni a; N Vanlaiphai paltlang kawngpuite pawh dan-chah a ni ang.

N Vanlaiphai JAC chuan, khawtlang thil phût avangin village council-a MNF member-te'n bân an inhuamna leh MNF unit hruaitute'n party seal-te hmunpuia thehluh an inhuamna chu kaltlangpui turin an rêl a; chumi ang chuan VC member, MNF party-a mite chuan an nihna an chawlhsan tawh thu N Vanlaiphaia YMA hruaitute chuan an sawi.

MNF party unit hrang hrangte pawhin March 28, 2023 hian Mizo Hnam Rûn, Aizawlah an seal-te thehluh an tum bawk.

N Vanlaiphai JAC chuan, ruling party hruaitute an nihna aṭanga an bàn chuan, kum 2023 chhung chuan N Vanlaiphaiah MNF party unit leh group hruaitu dang din a remchang lo tih an tarlang a, "Hei hi party hruai báng tate thlâktu tur hruaitu dang ruat an nih loh nan leh tuna hruaitu ni mekte chhanhauhna a ni. Hruai-tu bànna thehlutte hi an chanvo ngai chelh lehna remchang a awm a nih chuan an dinhmun ngaia an awm leh hi JAC duh dan a ni," an ti.

N Vanlaiphaia YMA hruaitute chuan, ruling party mi VC member-te an chawlh chhungin an khuaah party dang kaihhruai VC din an remtih loh thu leh independent VC a ding mai tura an ngaih thu te, MNF unit hruaitu báng tate thlâktu tur hruaitu dang ruat an remtih loh thute an sawi a ni.

N Vanlaiphai aṭanga thu dawn danin, sorkarin N Vanlaiphaia BAO pisa thar a sak chu kum 2022 tìr lam khan Block Agriculture Officer leh thawktu dangte'n an luah lut a, Mizoram sorkar chuan January 30, 2023 khan BAO chu East Lungdarah sawnna tur thupek a tichhuak a ni.

Sorkar hmalak danah an lungawi loh avangin N Vanlaiphai Joint Action Committee (JAC) an din a, BAO sawnna thupek chu February 17, 2023 ral hmaa sût tura ngenna sorkarah an thehlut.

Sorkar aṭangin hma-lakna leh hriattirna an hmuh loh avangin JAC hmalaknain February 21, 2023 khan kawngzawh huaihawt a ni a, mi sang tél an tel a, BAO sawnna thupek copy an hâl bawk.