KHAWTHLIR

Judge-in tlawh

Gauhati High Court judge Justice Marli Vankung, Champhai Judicial District portfolio judge ni bawk chuan March 25, Inrinni khan Champhai judicial district hnuaia Champhai leh Khawzawl district-a Law & Judicial ram, hmunhma leh hmalaknate a tlawh. Judge hi Law & Judicial secretary Helen Dawngliani, joint registrar Vincent Lalrokima, Champhai chief judicial magistrate V Vanlalhriata, Khawzawl DC CC Lalchhuangkima leh sorkar hotu dangte'n a ṭawiawm a ni.

Sorkar inbuatsaih

Chief secretary Dr Renu Sharma hoin March 25, Inrinni khan CS conference hall-ah sorkar hotute an ṭhukhawm a, April 1, 2023-a Union Home minister Amit Shah-a'n Mizoram a rawn tlawh huna thil pawimawh turte an sawiho. Home Minister hian Zokhawsanga Assam Rifles hmun a hawn dawn bakah, Laldenga Cultural Centre leh sorkar hmalakna ṭhenkhat lungphum a phûm tur dang ruahman a nih thu sorkar thu-chhuahin a tarlang.

Minister-in hmanpui

YMA, Chalfilh Group chuan March 24, 2022 khan Pehlàwn khuaah inkhawmpui vawi 22-na an hmang a, minister Lalchhandama Ralte-in a hmanpui. Minister chuan, Kristian nun dan ṭha zirtir uar zel turin YMA member-te a chah a, "Social media-ah hmaichhana sawi duh loh tur thu mak sak tak tak a tam sâwt hle a, social media ṭawngkamah fimkhur a pawimawh ta hle a ni," a ti. Hmar tlangdung chu tlangdung mawng-ping a nih ṭhin thu leh tunah erawh chuan nasa taka hma lak a nih avangin Zoram tlangdung hmasawn ber pawl a nih mek thu a sawi bawk.

Siaha dist-ah  MCC puan a ni

Mara Autonomous District Council chhunga village council inthlan hun atan April 18, 2023 ruat a nih avangin inthlan hun puan ní March 23, 2023 aṭangin Siaha district-ah Model Code of Conduct (MCC) hman ṭan a ni a, MCC hian inthlan result puan zawh thleng a awh ang.