Urban Employment Guarantee Scheme kan kalpui dawn - MPCC President

Congress president Lalsawta chuan, Congress party-in sorkarna an chan chuan khawsak harsate chhawmdawlna tur Urban Employment Guarantee Scheme an kalpui dawn tih sawiin, ni 100 inhlawhna a tàwp avanga lungngai lo turin LMC huam chhunga mipui a chah.

Lalsawta hian March 25, Inrinni khan Luangmual leh Lunglawna vantlang inkhawmah thu sawiin, "LMC avangin Lungleia chhungkaw tam tak chu ni 100 inhlawhna a bo tawh dawn avangin an lungngai a, mahse, lungngai lo turin kan duh. Congress party-in sorkarna kan chang a nih chuan chhungkaw khawsak harsate chhawmdawlna tur Urban Employment Guarantee Scheme kan kalpui dawn a ni," a ti.

Mizoram buaina ber chu ram hruaitute'n hausak an duh em vang a nia sawiin Lalsawta chuan, "Chu'ng chuan ram himna a tiderthâwng a ni. Pathian leh Mizoram mipuite'n Congress party sorkarna an pe a nih chuan ram hrisel leh him, chenna nuam mipuite kan pe dawn," a ti a; chuta tan chuan LMC inthlanah bul ṭan a ngai niin a sawi.

MPCC President chuan, MLA Zodintluanga'n RT-PCR a pek chu Lunglei district-a MNF MLA-te'n an dawng ngam lo nia sawiin, "Thihna leh natna an mipuite'n an tawh laia huaisen ngam lo Lunglei MLA-te ka dem. Mi dawihzep tan hruaitu ropui leh rintlak a nih theih loh," a ti a; Congress party-in Mizoram hmun tam takah 'Ṭhat loh theih lohna báwm' an din theih thu leh chumi hmang chuan Mizoramah sorkar ṭha, taima leh thawkrimte dinchhuahna an siam dawn thu a sawi bawk.

Congress party vantlang inkhawmah hian MLA Lalrindika Ralte leh Congress Mahila president Vanlalawmpuii Chawngthu te pawhin thu an sawi a ni.