Zoramthanga sorkarin AR-te bungbél nen Zokhawsangah a suan phei - Dr Thangtea

MNF adviser Dr R Lalthangliana chuan March 25, Inrinini khan Lungleia hmun hrang hranga street campaign-ah thu a sawi a, MNF sorkarin Lunglei tan hna a thawh nasat thu leh Assam Rifles-te an bungbél nen Zokhawsangah an insuan thu a sawi.

MNF thuchhuahin a tarlan danin, Dr R Lalthangliana chuan, Zoramthanga kaihhruai sorkarin Assam Rifles-te chu an bungbél nen Zokhawsang lamah a suan phei chur chur thu leh lawmawm a tih thu a sawi a ni.

R Lalthangliana chuan, MNF sorkar chu Lunglei lam ngaihthah leh engmah thawk lo anga social media-ah party ṭhenkhatin an vawrh darh chu ṭha lo a tih thu sawiin a chháng lêt a; MNF sorkarin Mizorama integrated laboratory lian ber chu Lungleiah an dah thu te, Civil Hospital-ah khum 28 awmna ICU an hawn tawh thu te, cheng vbc. 14.43 sênna tur Lunglei market building sak ṭhat tur lung phùm a nih tawh thu te, Lunglei by-pass road atan cheng tam tak ruahmanna siam thar a nih thute a sawi bawk.

MNF Adviser chuan, Lungleiah LMC a awm ṭul ti lo an awm thu sawiin, "Municipal nasa takin an sawisel a, flag eng nen an tlan phe dâwr dâwr a, nasa takin an bei ve leh si. Inhnuhdawh hun pêl tawh mah se, LMC awm ṭha lo titute hian candidate an inhnûkdâwk ngam mai lo em ni tih hi ka zawhna a ni. Keini chuan a hlutna leh ṭhatna kan hria a, LMC sorkar hmangin Lunglei khawpui kan chei dawn a ni," a ti.