Lunglei mipuiin ni 100 inhlawhna an neih zel theih nan sorkarin budget-ah a dah - MNYF; MNYF thu hi belhchian dáwl lo a ni - MPCC

Mizo National Youth Front (MNYF) chuan March 25, 2023 Inrinnia thuchhuah an siamah, Lunglei chu municipal council inenkawlna hnuaia awm tur ni mah se, mipuite'n ni 100 inhlawhna an neih zel theih nan MNF sorkarin budget-ah a dah fel tawh niin an tarlang.

MNYF thuchhuah chu belhchian dâwl lo a nih thu MPCC chuan an tarlang thung a, "Dâwt a nihzia kum 2023-24 budget document aṭangin awlsam taka finfiah mai theih a ni. Dâwt chiang tak hmanga Lunglei mipui bum tumna hi Lunglei mipui zahlohna leh thamlohna nasa tak a ni," tiin, LMC inthlanah MNF candidate vote lo ngam turin Lunglei mipui an ngen a ni.

MPCC tarlan danin, sorkar kum 2023-24 ah ni 100 inhlawhna (MGNREGS) atan sorkar laipui aṭangin cheng nuai 11,000 hmuh beisei a ni a, chu chu sorkar kum kal mek 2022-23 chhunga hmuh tur zata chhût nuai 22,462 aiin, cheng nuai 11,462-in a tlem zawk.

Sorkar kum kal mek leh sorkar kum thar tura ni 100 inhlawhna atana CSS hmuh beisei zat a inthlauh êm avangin a taka LMC nei mai tur Lunglei mipui tan budget-ah ni 100 inhlawhna tur a awm lo tih a chiang hle niin MPCC chuan an sawi a, "Ni 100 inhlawhna atana state sorkarin CSS a lo do lêtna tur state matching share pawh 2023-24 budget-ah cheng khat mah dah a ni lo," an ti.