April 19, 2023-ah LC by-election

State Election Commission chuan Zemabawk, Durtlang Leitan leh ITI Veng local council by-election hun atan April 19, 2023 a ruat. By-election-a thlan chhuah LC member tharte term chu kum 2020-a LC inthlanpuia thlante hun tàwp ruala tàwp ve tura tih a ni.

Sorkar thuchhuah tarlan danin, LC by-election-a chuh tumte tan March 31, 2023 thleng hming pek luh theih a ni a, April 5 tlai dar 3 thleng inhnuhdawh theih a ni ang. April 19, 2023 zing dar 7 aṭanga tlai dar 5 thleng vote thlak hun hawn a ni dawn a, vote thlak zawhah vote chhiar nghal tur a ni. Vote thlak ṭhat ngai a awm chuan April 20, 2023-ah thlak a ni ang.

SEC chuan inthlanna felfai leh muanawm neih a nih theih nan inthlan buaipuitu te, political party, media, pawlte leh mipui ṭawiawmna a ngen a, vote neite chu vote thlak ṭheuh turin a sáwm bawk. By-election neih hun tur puan ní, March 24, 2023 aṭangin veng pathumah hian model code of conduct hman nghal a ni.

Electoral roll thar bera a lan danin, Durtlang Leitanah polling station (PS) pathum awmin voter 2,989 an awm a, Zemabawkah PS pariatah voter 7,032 leh ITI Vengah PS panga awmin, voter 4,595 an awm a ni.