LMC inthlanpui neih a ni dawn ta
Lunglei Municipal Council (LMC) inthlanpui hmasa ber chu vawiin hian neih a ni dawn ta a, zing dar 7 aṭanga tlai dar 4 thleng vote thlâk hun hawn a ni dawn. Vote tlate chu April 3, 2023 (Thawhṭanni)-ah chhiar a ni ang.
LMC inthlanah hian vote thlâk turte tan mahni nihna tichiang thei identity card ken a ngai a; voter identity card (EPIC), Aadhaar card, PAN card, driving license leh ID rintlak dangte hman theih a ni.
Inthlana duty tur polling party-te chuan nimin chawhnu khan an duty-na tur polling station an pan. Polling party 55 an awm a, chu'ng zinga 44 chu polling station 44-a duty turte an ni a, 11 chu reserved polling party niin, a ṭul huna koh mai theih tura inring tura tih an ni.
LMC inthlan turah hian voter 40,548 an awm a, mipa 19,123 leh hmeichhia 21,245 an ni. Candidate 42 an awm a; INC, MNF leh ZPM-te'n bial tin chuhin, candidate 11 ṭheuh an nei a, BJP-in candidate pakua an nei bawk.
LMC inthlanpuiah hian ZPM tih loh political party dangte chuan Election Commission of India-a an inziah luha an chhinchhiahna (symbol) an hmang dawn a; BJP-in lotus, INC-in kutphah leh MNF-in arsi an hmang ang. ZPM erawh chu recognised party a la nih loh avangin symbol atan ni (sun) chhuak lai an hmang dawn a ni.
Lunglei SP Rahul Alwal chuan, inthlanah hian venhimna lam thawk turin police 158 an duty dawn tih a sawi a, "LMC inthlan hi thianghlim, felfai leh boruak muanawm tak hnuaia neih a nih theih nan Lunglei police chuan LMC huam chhungah dan leh thupek kenkawh leh inthlan kaihhnawiha venhimna hrang hrang pe turin police-te duty dan tur mumal leh kimchang taka siam a ni," a ti.
Lunglei SP chuan, inthlan hun chhungin dan leh thupek ngai pawimawh tur leh khawtlang muanna tichhe thei leh inthlanna tibahlah thei buaina siam lo turin mi tin a chah bawk.
Lunglei district municipal election officer Ramdinliani, bawrhsap tarlan danin, LMC inthlana vote tlate chu April 3, 2023 chawhma dar 10 aṭangin Saikuti Hall-ah chhiar a ni dawn a, counting hall pahnihah dawhkan 12 ve ve a awm dawn a ni.
