N Vanlaiphaiah total bandh huaihawt a ni; MNF unit hruaitute'n Hnam Run-ah seal an thehlut

North Vanlaiphai aṭanga East Lungdar khuaa Block Agriculture Office (BAO) sawn duh lohna lantir nan nimin khan North Vanlaiphai khuaa total bandh huaihawt a ni. N Vanlaiphaia MNF unit hrang hrang hruaitute'n nimin vêk khan Mizo Hnam Rûn, Aizawlah MNF-a an nihna seal-te an thehlut.

N Vanlaiphai Venglai Branch YMA secretary R Lalbiaknunga hnen aṭanga thu dawn danin, North Vanlaiphai khuaa VC, tlawmngai pawl leh political party hrang hrangte telna Joint Action Committee huaihawt total bandh hi zing dar 6-ah ṭan a ni a, tlai dar 5 thlenga kalpui tura tih ni mah se, mipuiin an thlàwp ṭhat avangin chhun dar 1-ah tihtawp a ni.

Total bandh a hlawhtlin theih nan N Vanlaiphai khuaa YMA branch palite chuan an veng chhung ṭheuhah duty an indah a; dawr, sikul leh pisa zawng zawng khâr niin, pâwn chhuakvâk an awm lo.

N Vanlaiphai JAC hian an khuaah BAO dah lêt turin Chief Minister hnenah March 8, 2023 khan lehkha an thehlut a, March 17, 2023 ral hmaa tihlawhtling turin an phût. An hun tiam a liam hnuah pawh thu lawmawm hriat tur a awm loh avangin total bandh an huaihawt ta a ni. February 21, 2023 khan kawng an zawh tawh a, BAO sawnna thupek copy an hâl bawk.

Mizoram sorkarin N Vanlaiphaia Block Agriculture Officer pisa thar a sak chu kum 2022 tìr lam khan BAO leh thawktu dangte'n an luah lut a, January 30, 2023 khan BAO chu East Lungdara sawnna thupek a tichhuak leh a ni.

N Vanlaiphai JAC kaihhruainaa a hma lama an lungrual tawhna leh ruahman angin nimin khan N Vanlaiphai khuaa MNF unit zawng zawngte chu an seal-te Mizo Hnam Run, Aizawlah thehlut tura tih an ni a; MNF unit panga - Venglai, Bangla Veng, Rahsi Veng, Forest Veng leh Rawlkhang unit hruaitute'n an seal zawng zawng an thehlut a, unit pahnih erawh chuan an thehlut lo.

MNF unit seal thehluh tumtute chu MNF vice president Lalthlengliana'n léngah sáwmin an inkâwm a, N Vanlaiphai thil phût chu tihhlawhtlin theih a nih rih loh thu hrilhin, N Vanlaiphai PHC chu CHC-ah hlàn kai a lo tiam a ni.

Ṭha taka an inṭhen hnuah N Vanlaiphai JAC hruaitute chuan seal thehlut ngei tur leh, an thehlut lo a nih chuan puan dum nen an lo hmuah tur thu an hrilh a, chuvang chuan seal thehlut turin Mizo Hnam Runah an kal a ni. An seal chu Hnam Rûna awm MNF treasurer K Vanlalauva'n a lo dawng thei lo a; vice president Lalthlengliana an koh hnuah ani'n a dawng ta a ni.

BAO dah lêt tura phût nan N Vanlaiphai VC-a MNF member-te chuan MNF member an nihna aṭanga bànna DLAO hnenah an lo thehlut tawh bawk.