Mizoram-Myanmar inkal pawhna kawngte Siaha district-ah khâr rih a ni dawn

Myanmar ram chhunga March 22, 2023-a Mizoram mi pathum thia hmuhte tualthihna kal zelah Mara Thyutlia Py (MTP) Sub-Headquarters, Chhaolo chuan an huam chhunga Mizoram leh Myanmar inkal pawhna kawngte chu vawiin March 29 aṭang­in an khâr rih dawn.

Tarlan tawh angin, March 19, 2023 zing vàrṭiana Siaha aṭanga chhuak mi pathum - B Lalṭhafamkima, South Lungpher leh New Siaha mi pahnih C Biaksuii leh Bablu Talukdar te chu March 22, 2023 zan khan Myanmar ram chhung, Mizoram aṭanga mél 2 vela hláah thia hmuh an ni. March 23 zingah an ruang lâk a ni a, zanah an khua ve veah vui a ni.

MTP Sub-Headquar­ters, Chhaolo thuchhuah chuan, mi pathum tualthihna chu an dem tak zet tih tarlangin, "Kan rama vanduaina thleng hi kan duh lohzia lantir nan kan huam chhunga Iana (Ainak), Lobo, Noaotlah leh Siata khuaa Myanmar nena inkalh pawhna kawngte chu March 29, 2023 aṭangin thu leh awm hma chuan khâr vek rih a ni dawn," a ti.

MTP Chhaolo Sub-Hqrs chuan, Mara ramah ruih theih thil - drug, zu, adt. a tam hle tih sawiin, "Kan ṭhalaite ruih theih thil bâwihah nasa takin an táng a, ruih theih thilte hi Myanmar aṭanga lak luh vek a ni. Thil ṭha lo leh túr hlauhawm laka ram mipui kan him zawk theih nan Myanmar nena inkalh pawhna hi tun dinhmun atan khâr turin thutlukna kan siam a ni," an ti a; an hmalakna chu Mizoram himna atan a ni tih hriaa hrethiama, thláwp turin mipui an ngen a ni.

Mi pathum thihna chungchangah hian Central Young Lai Association (CYLA) chuan thuchhuah siamin, pawi khawihtute man an nih theih nan Myanmar rama zalenna sualtu pawl hrang hrangte hma la tura an beisei thu an tarlang.

MTP Gen.Hqrs pawhin March 23 khan thuchhuah an lo siam tawh a, "He thil duhawm lo leh rapthlak tak titute kan dem tak zet a, tun hnuah mi pawi sawi lote chungah kut thlakna leh hleilenna lantir tawh lo turin kan inhriattir a ni. Sorkar leh police-te pawhin chhui chiang se la, thu dik hai lang ngei tur leh inhnamhnawihte mana an phû tâwka hrem ngei turin kan phût a ni," an ti.

CYLA chuan, mi pathum thihna chungchanga sorkar thuneitute leh CYLA hmalakna thláwpa a theih ang anga thawhpui turin Mizoram mipui leh Myanmar-a Zo hnahthlakte an beisei thu an tarlang a, "A bik takin Myanmar buaina avanga zalenna sualtu pawl hrang hrang CDM, CDF, PDF, CNA, adt., pawh he thihnaa pawi khawihtu leh inhnamhnawih zawng zawng man chhuah a nih thuai theihna tura hma la turin kan beiseiin kan ngen a ni," an ti.

CYLA chuan, "Pawi khawihtute man an nih vat theihna tur leh dan anga a na thei ang bera hrem an nih theihna tura hma la zel turin sorkar thuneitute kan beisei," an ti a, mi pathum thihnaa inhnamhnawihte man chhuah kawngah a theih ang angin hma an la tih an tarlang.

Thil thleng chu an hlauh rûk a ni tih sawiin CYLA chuan, "Myanmar buaina avanga sahimna beiseia min rawn bêltu kan unaute chhawmdàwl hna theihtawp chhuaha kan thawh laia hetianga thungrulh kan ni hi kan hrethiam lo tak zet," an ti. Pawi khawihna a thlen tawh loh nan an mi leh sate thunun tur leh khuahkhirh turin Myanmar-a Zo hnahthlakte chahin, "CYLA-in kan rama rawn ráltlânte enkawl kawngah khauh zawka khuahkhirh an nih theih nan ruahmanna a siam nghal mek a ni," an ti.

CYLA chuan, Myanmar ram buaina avanga an harsatna tawh chu an hriatthiampui rualin, anmahni buaina avanga Mizoram mipui an thlabàr an phal lo tih sawiin, "Tuna thil thleng ang hi a thleng leh a nih chuan kan duh miah loh thil, unau inkara thleng lo tura kan ngaih thil hial a lo thleng a nih pawhin min dem lo turin Myanmar lama kan unaute kan chah lâwk a ni," an ti a; Myanmar ram buaina remchangah la a, Mizoram chhungah dan loa thil tih tum lo turin an chah bawk.

MTP chuan, Myanmar ram buaina avangin Zo hnahthlak tam takin sahimna zawngin Mara ram an pan tih sawiin, "MTP leh Mara ram mipuite'n anmahni chhawmdawl hna kan thawh mek laia hetianga thil duhawm lo a thleng leh sual thila inhnamhnawih a, kan ram zalenna leh remna tihderthâwng zawnga chetna a awm zel hi kan duh lo a, a ṭul anga do zel kan tum," an ti a; Myanmar rama Zo hnahthlak pawlte leh ráltlânte chu fimkhur tur leh Mizoramah ram leh khawtlang tana mi ṭangkai nih tum turin an chah.

Pawi khawihna thleng chungchangah thu dik lo leh belhchian dâwl lo thehdarh lo tur te, thil thleng chu chî leh hnam ang te, páwl leh khua ang zawnga boruak ṭha lo siam phah nan hmang lo turtein MTP chuan mi tin an chah bawk.