Health care scheme-ah damlote bill November 2021 chin pe chhuak tawh

Mizoram State Health Care Scheme (MSHCS) hnuaia damlo bill thehluhte chu November 2021 leh a hma lama thehlutte hnenah pawisa pek chhuah a ni tawh. Hetih lai hian, MSHCS hnuaiah hian damlo bill bá cheng vbc. 70 chuang a la awm.

Vanglaini thu dawn danin, MSHCS hnuaia bill lutte chu sum hmuh a nih veleh pek chhuah tura buaipui nghal zel a ni a, November 2021 thlenga bill lut tawh chinte hnenah pawisa pek chhuah a ni tawh. Pawisa dawn a nih leh veleh hmabak chin aṭangin pek chhuah leh a ni ang.

Damlote inenkawlna senso bill la pek chhuah loh cheng vbc. 70 vel a awm reng tlangpui a; tun hnaiah cheng vbc. 65 velah tlahniam zawk mah se, tunah chuan cheng vbc. 70 chuang a tling leh tawh.

MSHCS hnuaia inziak lut mekte chu March 31, 2023 thleng atan a ni a, April 1, 2023 aṭang chuan inziak lut tharte tan lo chuan bill thehluh theih a ni dawn lo. Tunlai hian inziah luhna hun hawn mek a ni a, May 2023 thleng hun hawn a ni dawn.

MSHCS-a inziah luhna hun hawn mek a la nih avang leh hmun hrang hranga ziah luhte MSHCS office-ah thehluh a la nih loh avangin mi engzat nge inziak lut dawn tih hriat theih a la ni lo.

MSHCS-a inziahluh man chu ration card eng tan Rs 200, ration card pawl tan Rs 1,000, ration car var tan Rs 2,000 leh ration card nei lo tan Rs 2,000 a ni.