KHAWTHLIR
Thisen pe
Lunglei College NSS unit chuan nimin khan an college hall-ah thisen pek huaihawtin, Civil Hospital Lunglei tan thisen unit 94 an pe a, petute mipa 57 leh hmeichhia 37 an ni. Hrangbana College NSS unit pawhin March 27, Thawhṭanni khan an college hall-ah Civil Hospital, Aizawl tan thisen unit 67 an pe bawk.
Sa pêl/veh khap
Lunglei district magistrate Ramdinliani chuan thupek chhuahin, Lunglei district-ah sava leh ramsa veh an awm ṭhin tih hriat a nih thu a tarlang a, "Lunglei district-ah airgun, silai, thang leh hmanraw dang hmanga ramsa leh sava veh/ kah/ pelh/ awh khap a ni. Thupek zâwm lote chu IPC Section 188 hmangin hrem theih an ni ang," a ti.
Kuhva rah man
Serchhip Police hnuaia East Lungdar Police Beat Post-a duty-te chuan March 27, Thawhṭanni khan truck pahnih aṭangin Myanmar aṭanga dan loa lak luh nia hriat kuhva rah ip 109 an man a, Custom Preventive Force, Lunglei hnenah an hlan. Kuhva rah phurtute chu H Lianmanga leh Mungngaihliana te an ni a, Zokhawthar aṭanga an phurh a ni.
Ganja man
Mizoram Police-a CID (Special Branch) team chuan March 27, Thawhṭanni khan Falkland Vengah ganja kg. 2.402 leh Mualpuiah ganja gram 292 an man a, a vaiin kg. 2.694 a ni. Ganja kaihhnawiah hian VL Thianga (18) s/o Lalramchhana, Ramthar North, tuna Salem Mualpuia khawsa mek nia inchhál an man a, Special Narcotics Police Station-ah thubuai ziah luh a ni.
Buhtun zirho
Lunglei District Programme Office, Child Development Programme Office, District Agriculture Office leh World Vision India te chuan Poshan Pakhwada 2023 pualin March 27, Thawhṭanni khan Lunglei Cultural Heritage Centre-ah 'Millet based tribal food fair & promotion of millet thali' an buatsaih. Self help group, anganwadi-a hnathawkte leh hmeichhia kum 10-19 inkar an tel a, millet (buhtun) hmanga thil chi hrang hrang siam dan anzirtir a ni.
Kawngpui khâr dawn
Hridaikawn aṭanga Kulikawn Hospital via CP Road inkar kawngpui chu PWD-in vawiin aṭanga April 8, 2023 thleng an thawm ṭha dawn a, ni tin zing dar 9 aṭanga tlai dar 4 inkarah Hridaikawn aṭanga Kulikawn Hospital lamah lirthei tlân theih a ni dawn lo. ITI Veng leh Aizawl By-Pass Road (World Bank Road) inkar kawngpui pawh PWD-in naktuk aṭanga April 1, 2023 thleng an thawm ṭha dawn a, hna thawh chhungin ni tin chawhma dar 10 aṭanga tlai dar 5 inkarah kawngpui khâr a ni ang.
Unit House hawn a ni
2nd IR Battalion commandant Ruatsanga Ralte chuan tun hnai khan 2nd IR Bn. Hqrs complex-ah Mizoram Police Wives Welfare Association (MPWWA) sak Unit House a hawng. Unit House hi police nupui/fanu leh a mamawh apiangte'n puanṭhui an zirna tur a ni a, 2nd IR-a MPWWA Unit member-te leh police officer/staff-te'n self help basis kaltlanga Rs 6,54,839 sênga an sak a ni.