India miten hmar chhak min hmuh hranna hi infiamna vangin a reh tawh - SYS Minister

Sports & Youth Services minister Robert Romawia Royte chu March 27, Thawhṭanni khan New Delhi-a National Sports Conclave-ah a tel a; hmarchhak bial mipui chu India mipui aṭangin 3.3% chauh an nih laiin, Indian Super League player zinga 30% leh I-League player zinga 40% chu hmarchhak bial mi an nih thu a sawi a, infiamna vangin hmar chhak en hranna chu a reh thu a sawi.

SYS Minister hian north east sports chungchanga speaker zinga ruat a nih angin thu a sawi a, "Hmarchhak bial mipuite hi India ram pum mipui aṭanga chhûtin 3.3% chauh an nih laiin, ISL player zinga 30% leh I-League player zinga 40% chu hmarchhak bial mite an ni a, India ram aṭanga hrang deuha an inhriatna leh India ram lailia mite'n hmarchhak state-te an hmuh hran deuhna hi infiamna avangin a reh tawh a, inpawhna ṭha tak a awm tawh a ni," a ti.

Robert Romawia chuan, hmarchhak bial leh a chhunga cheng mipuite chu India ram hmun dang lak aṭangin a danglam a, a ramri pawh 99% chu ram dang nena inrina a nih thu a sawi a; hmarchhak state-ah theihna (talent) awm mahse infrastructure a la ṭhat lo hle thu te, talent la hmuh chhuah loh a tam a rin thu te, Mizoram sorkarin infiamna hmasawnna atana sport chu industry nihna a pek thu a sawi bawk.

National Sports Conclave-ah hian Union Youth Affairs & Sports minister Anurag Thakur chu khuallian a ni a; sorkar laipuia secretary te, infiammite leh infiamna chanchin thar ziaktute an tel a ni.