MoS-in Champhai College a tlawh

Minister of state TJ Lalnuntluanga chuan nimin khan Champhai College a tlawh a; college zirtirtu leh non-teaching staff indaih lohna phuhru turin sorkarin hma a lak mek thu a sawi.

Champhai College seminar hall-a college hotute nen an inkawmnaah TJ Lalnuntluanga chuan, "Champhai College tihhmasawn leh tihchangtlun kawngah sorkarin theihtawp chhuah zel a tum. College zirtirtu leh non-teaching staff indaih lohnate phuhru turin sorkarin hma a la mek a, theihtawp chhuaha nawr zui ka tum," a ti.

Ministry of Minority Affairs kaltlanga Chhangphut Field chhak kopanga lung (breast wall) remna tur bawhzui tum a nih thu sawiin Minister chuan, "PMJVK kaltlangin examination hall ruahman tura hmalak mek a ni," a ti a; college hminga principal-in dilna leh mamawh a thlente chu theihtawp chhuaha bawhzui a tum thu a sawi bawk.

Minister hi Champhai bawrhsap James Lalrinchhana'n a ṭawiawm a, Champhai College principal P Lalhmingliana bakah, IQAC coordinator leh college zirtirtute'n lo dawngsawngin, an mamawh leh harsatnate an lo thlen a ni.

TJ Lalnuntluanga hian nimin khan a bial Champhai South chhunga Champhai Vengthara Urban Primary Health Centre a tlawh bawk a, oxygen concentrator a pe. Champhai Vengthar UPHC hi March 2021-ah bul ṭan a ni a, doctor pakhat, staff nurse pathum, health worker pahnih, group D pahnih, pharmasist, laboratory technician leh accounts clerk pakhat ṭheuh an thawk mek a ni.