Police-in BN Mullik Memorial-a an champion an lawm; Tumruhna hi kan ram chawikangtu tur a ni - CM

Mizoram Police chuan nimin khan 71st BN Mullick Me-morial All India Police Football Championship Men 2022-2023 a an champion 1st Bn. MAP Playground, Armed Vengah an lawm a, an hun hmanpuitu chief minister Zoramthanga chuan tumruhna chu Mizoram chawikangtu tur a nih thu a sawi.

Chief Minister chuan khawvel ngamtute chu huaisen taka an hmaa harsatna awm su ngamtute an nih thu sawiin, "Tumruhna hian mihring a chawikang a, hnehna a pe ṭhin. Tumruhna hi kan ram chawikangtu tur a ni. Kan ram thilsuala min hnuk hniamtu hi huaisen taka kan sut chuan kan hneh dawn tih rilru put a ngai," a ti.

Mizoram leh hmarchhak state-te vanduaina chu Myanmar aṭangin thil ṭha lo a lo lut nasa hi a nih thu sawiin Zoramthanga chuan, "Tunlai phei chuan a rawn lut nasa lehzual. Nu leh pa an mangang. Hemi lo dang tur hian theihtawp chhuah a ngai," a ti a, ruihhlo dang turin police leh excise-ten theihtawp an chhuah a ṭul thu a sawi.

Chief Minister chuan all India champion nih chu thil ropui tak a nih thu sawiin, "Mizoram hi state tê leh kilkhawr, state naupang berte zinga mi kan ni. India ram chhunga awm lo anga ngaih hial kan hlawh. Tunah erawh champion nihna kan ngah tawh a, min hre ṭan ta," a ti.

Thusawitu dang, Home minister Lalchamliana chuan, "Team ṭha lehzual nei turin infiammi mithar lakluh a ṭul. Football chauh ni lo, Mizote tana beiseina awm chi-ah ṭan lak thar a ngai," a ti a, sum dinhmun ṭha em em lo mah se, police-a hnaruak 3,500 vel awmah sports quota (5%) bik tal lak theih ni se ṭha a tih thu sawi.

Home Minister chuan Mizoram Police-te chu kawng hrang hrangin an chhuanawm thu sawiin, "Post ruak 34%-35% awm chungin dan leh thupek kenkawh, ramri venhim, hnu- chhuina kawng leh conviction lamahte an thawk ṭha em em a ni. Duhthusam ni chiah lo mah se, discipline pawh a ṭha," a ti.

Champion lawm inkhawmah hian DGP Devash Chandra Srivastva leh MFA honorary secretary Lalnghinglova Hmar te pawhin thu an sawi.

Inkhawma tarlan a nih danin, 71st BN Mullick Memorial All India Police Football Cham-pionship Men 2022-2023 ah hian team 34 an chhuak a, tun hi Mizoram Police an champion ṭum khatna a ni. Kum 1993, 1996 leh 2012-ahte pathumna an lo ni tawh.