ZPM candidate-te'n sum seng tam ber

Lunglei Municipal Council (LMC) inthlan atana inbuatsaihnaa candidate-te'n sum an hman zat sorkar thuneitute hnena an thehluhah ZPM candidate-te'n sum an hmang tam ber a, BJP candidate-te'n an hmang tlem ber.

LMC inthlan inbuat-saihnaa candidate-te sum hman zat hi Accounts & Treasury department chuan March 28, Thawhlehni khan a ṭum thumna atan an endik a, endikna hnuhnung ber a ni nghal. Lunglei Treasury officer Vanlalrosiama Ralte-in ward I - VI a endik a, Audit & Accounts officer PC Lalrammuanpuia'n ward VII - XI a endik thung.

Endiknaa a lan danin, ZPM party candidate mi 11-te sum hman belh khawm chu Rs 4,87,292 niin a tam ber a; a dawttu MNF party candidate mi 11-te sum hman belh khawm chu Rs 4,77,625 a ni. Indian National Congress candidate mi 11-te'n Rs 4,22,466 an hmang a, BJP candidate mi pakuate'n Rs 1,69,390 an hmang.

Candidate zinga sum hmang tam ber chu ward no. VIII-a INC candidate Elizabeth Vaninmawii niin, Rs 87,530 a séng a, ward no. VIII vêka MNF candidate C Lalrindiki'n dawtin, Rs 73,175 a hmang a, pathumna chu ward no. IX-a ZPM candidate Zorinsanga Hmar niin, Rs 71,620 a séng.

Hetih lai hian, ward no. V-a BJP candidate Lalmuanpuii chu sum hmang tlem ber a ni a, Rs 6,840 a hmang a ni.