Mizoram-Myanmar ramria inkalpawhna kawngte khâr rih an awm belh zel

Siaha mi pahnih leh South Lungpher mi pakhatte Myanmar ram chhunga an tualthihna kal zelah Siaha district leh Lawngtlai district-a Myanmar ramri hnaih khaw hrang hrangah Myanmar lam kaihhnawih inkhuahkhirhna siam leh Myanmar nena inkalpawhna kawngte khâr rih an awm belh zel.

Young Lai Association (YLA) Sub-Headquarters, Bualpui Ng chuan March 28, 2023 khan hriattirna chhuahin, B Lalṭhafamkima, C Biaksuii leh Bablu Talukdar-te Myanmar ram chhunga an tualthihna avangin an huam chhunga Myanmar kalpawhna kawngte tiam chin awm loin khâr rih a nih thu an puang.

YLA Sub-Hqrs, Bualpui Ng chuan, "Râwng taka an thah duh lohna lantirna leh tualthattute man leh an motor rûkbo hmuh lêt leh vat a nih theih nana hmalakna kal zelah Indo-Myanamr border inkalpawhna Bualpui Ng Sub-Hqrs huam chhung - Archhuang Tuipui kai, Ṭialdawngilung Tuipui kai leh Vawmbûk Hnahvutnel Tuipui kaite March 29, 2023 aṭangin tiam chin awm loin khâr a ni," an ti.

Myanmar lam nen thil inhlan chhâwn (transit) phal a nih loh thu an tarlang a; YLA Bualpui Ng Sub-Hqrs chhunga YLA branch tinte chu an branch ṭheuhah Myanmar ráltlânte 125 bike khuahkhirh chungchangah March 29 aṭanga hma la turin an hriattir bawk.

Driver Association Sub-Hqrs, Tipa pawhin thuchhuah siamin, an thawhpui B Lalṭha-famkima, TATA Ace khalhtu leh a lirthei MZ-03-9720 bum chhuak a, Myanmar ram chhunga thah a ni chu an dem thu an tarlang.

Driver Association Sub-Hqrs, Tipa chuan, Myanmar mi two wheeler (Kenbo) leh lirthei dangte chu khaw chhung leh páwnah khalh chhuah phal a ni rih lo tih tarlangin, "Kan unau Burma lam mi leh lirthei reng reng thu leh awm hma chuan khaw chhungah luhtir rih loh tur. Thihna leh dam lohna thilah erawh chuan mahni khua VC, MTP, Driver Association-te remruat angin kalpui tur a ni. Burma thil phurin tu mah Burma ram chhungah kal loh tur," an ti.

Tarlan tawh angin, Mara Thyutlia Py Sub-Headquarters, Chhaolo pawhin an huam chhunga Mizoram leh Myanmar inkal pawhna kawngte chu nimin March 29 aṭang khan tiam chin awm loin khâr rih a nih dawn thu an lo puang tawh bawk.

March 19, 2023 zing vàrṭiana Siaha aṭanga chhuak mi pathum - B Lalṭhafamkima, South Lungpher leh New Siaha mi pahnih C Biaksuii leh Bablu Talukdar te chu March 22, 2023 zan khan Myanmar ram chhung, Mizoram aṭanga mél 2 vela hláah thia hmuh an ni. March 23 zingah an ruang lâk a ni a, zanah an khua ve veah vui a ni.