Union HM-in vbc. 315.05 hù project a hawng dawn; vbc. 2,098.97 hù project 6 lungphùm a phúm nghal ang

April 1, 2023-a Aizawla lo zin tur Union Home minister Amit Shah chuan Mizoram hmun hrang hranga project panga, cheng vbc 315.05 sênga thawh a hawng dawn a; cheng vbc. 2,098.97 sênga thawh tur project paruk dang lungphùm a phúm bawk ang. Project zawh tawh hawn tur zingah Zokhawsanga Assam Rifles battalion headquarters a tel.

Home Minister lo zin tur chungchangah BJP, Mizoram Pardesh president Vanlalhmuaka chuan nimin khan an party pisaah thuthar thehdarhtute a kâwm a, Home Minister-in project 11 hawn leh lungphùm phûm turte chu central BJP sorkar hmalakna vek a nih thu a sawi.

Vanlalhmuaka chuan, "Union Home Minister lo zin tur hi tute emaw chuan anmahni chah chhuah angin an sawi. Home Minister hian Central BJP hmalakna hrang hrang hawnga lungphùm phúm turin Mizoram chauh ni lo, state dangah pawh a kal zel dawn a ni," a ti.

Zawhna chhangin Vanlalhmuaka chuan, Zokhawsanga AR-te insawn hun turah sawi theih a neih loh thu a sawi a, "AR-te awmna hmun tur cheibàwl chu Mizoram sorkar kut a ni a, tunah hian Pu Amit Shah-a'n a rawn hawng dawn a ni," a ti a; AR-te insawn hmain an awmna tur hmun thar chu enfiah phawt a ngaih a rin thu a sawi.

Mizoram BJP President sawi danin, Amit Shah hian cheng vbc. 315.05 sénga Mizoram hmun hrang hranga project thawh zawh tawh panga Lammual aṭangin a hawng dawn a; cheng vbc. 2,098.97 sénga thawh tur project paruk lungphùm a phúm bawk ang.

Ministry of Home Affairs-in a ruahman dan chuan, Amit Shah hian New Delhi aṭangin April 1, 2023 chawhma dar 10:20-ah BSF thlawhtheihna hmangin Lengpui Airport a pan dawn a, chawhnu dar 1:05-ah BSF helicopter-in Ṭhuampui helipad a pan ang.

Ṭhuampui Helipad aṭangin lirtheiin Lammual a pan ang a, chawhnu dar 1:30 aṭanga dar 2:30 inkarah Lammualah hun a hmang dawn a, Lammuala hun a hman zawh chawhnu dar 3:50-ah Raj Bhavan-ah sorkar hotute a ṭhutkhawmpui ang. Tlai dar 4:25-ah BSF thlawhtheihna hmangin Lengpui Airport a chhuahsan leh dawn a ni.