LMC inthlanah vote 72.03% a tla

Lunglei Municipal Council (LMC) inthlanpui hmasa ber chu nimin khan neih a ni a, zing dar 7 aṭanga tlai dar 4 thleng vote thlâk niin, vote 72.03% a tla. Vote tlate hi April 3, 2023 (Thawhṭanni)-ah chhiar a ni ang.

LMC inthlanah hian voter 40,548 an awm a, mipa 19,123 leh hmeichhia 21,245 an ni. Candidate 42 an awm a; INC, MNF leh ZPM-te'n bial tin chuhin, candidate 11 ṭheuh an nei a, BJP-in candidate pakua an nei bawk. Ward 11-a polling station 44-ah vote thlâk a ni a, inthlanah hian venhimna lam thawk turin police 158 an duty a ni.

Inthlanah hian hmun ṭhen-khatah harsatna tênau awm mah se, harsatna lian tham awm loin tluang takin vote thlâk a ni.

Hriat theih chinah, Salem Veng Polling Station (PS)-a electronic voting machine (EVM)-ah chiang lo a awm a, mahse, kháwl thlâk loin tluang takin vote thlak chhunzawm a ni a; Luangmual PS-a EVM-ah ri danglam a awm avangin election official-te'n an thlâk a, chawhma dar 10 vel aṭangin vote thlak a kaltluang leh ṭan a ni. Sethlun PS-ah pawh EVM-a ballot unit-ah harsatna a awm a, rang takin thlak a nih avangin harsatna lian tham a awm lo.

LMC inthlana vote tlate hi April 3, 2023, kar leh Thawhṭanni-ah chawhma dar 10 aṭangin Saikuti Hall-ah chhiar a ni dawn a, counting hall pahnihah dawhkan 12 ve ve a awm dawn a ni.