KHAWTHLIR

Dy. CM-in hawng

Deputy chief minister Tawnluia chuan nimin khan a bial chhung Khawzawl Vengthar PWD Complex-ah Khawzawl District Tennis Association (KZDTA) Tennis Court chei thar a hawng. Tennis Court hi Balaji Construction chuan tunhnai khan an CSR fund hmangin a chhuat chhun zawl hna an thawhsak a, hemi hnu hian MLA fund Rs 2,00,000 sengin cheiṭhat hna thawh a ni.

Dah phal lo

Hunthar Veng lei tlahniam leh a venna tur siam hna chu zawh fel ni tawh mah se, lei che leh tawlh a awm palha a ven dan tur hriat a nih loh avang leh, uluk taka vil zuia enkawl a ngaih avangin Hunthar Veng lei tlahniam huam chhung (NH-54) ah lirthei dah phal a nih loh thu Traffic SP Rodingliana Chawngthu chuan a tarlang. Thupek zawm lo, mante chu MV (Amendment) Act, 2019 Section 179 hmanga hrem an ni ang.

Oxygen hlan

Minister of state TJ Lalnuntluanga chuan nimin khan Champhai khawpui leh a chhehvela YMA Branch 21 leh Sub-Hqrs. YMA Champhaite hnenah oxygen concentrator a hlan. Oxygen concentration hi Formosa Foundation India bultuma sem a ni a; Minister chuan thu sawiin, YMA member-te chu Zonun zemawi chawinung a, midangte puih duhna thinlung tak tak nei chhunzawm zel turin a chah.

Kum 50 tlin lawm

Rullam khua chuan nimin khan haw runpui leh rambuai hnua an khua an luahleh aṭanga kum 50-na lawmna an hmang a; minister Lalrinawma'n hmanpuiin, Vuttaia Rûn-ah rambuai laia Rullam khaw mi pasarih martarte hriatrengna lungphun a hawng nghal. Minister chuan, "Kan ram leh hnam a boral loh nan hnamah kan ṭhanharh a ngai," a ti a, hnam fing apiangin an hnam martarte an zahin an ngaisang ṭhin tih a sawi.

Lehkhabu tlangzarh

Road & Infrastructure Development Board vice chairman H Lalzirliana, MLA chuan nimin khan a pisaah ZoCareer Solutions director RK Hnuna ziah, 'Mizo Competitive Year review 2022' tih lehkhabu a tlangzarh. MLA chuan, "Mizo ṭhalaite hian ze nghet tak kan neih a ṭul. Education background kan nei ṭha tâwk lo a nih pawhin huaisenna tak tak nen chuan mi hlawhtling tak a nih theih," a ti.