Mizoramah project zawh hun tur aia tlaia zawh theih hram a ni ṭhin hi tih tawp a ngai - Governor

Nimina Raj Bhavan-a Regional Institute of Paramedical and Nursing Sciences (RIPANS), Mizoram hotute nen an inkawmnaah Governor Dr Hari Babu Kambhampati chuan, RIPANS tihchangtlunna tura hnathawh mek chu a beisei aia ṭha leh contractor-te'n an intiamna bawhchhe loa an hna an thawk zo thei tur chu lawmawm a tih thu a sawi a, "Mizoramah project tam zawk chu a zawh tur hun aia kum nga leh a aia tlaiahte zawh theih hram a ni ṭhin hi tih tawp a ngai a ni," a ti.

Governor chuan RIPANS aṭanga zir chhuak tawh zawng zawng aṭanga chhuta 93% in hna ṭha tak an hmu thei chu hlawhtlinna ropui tak a nih thu a sawi a, "RIPANS aṭanga zirlaite'n an zir chhuah hma pawha hna an hmuh theih nan campus interview tam zawka buatsaih dan zawn a ṭul," a ti a, damdawi-in leh company lian deuhte hriatah RIPANS chu hmelhriattir tum turin RIPANS hotute a chah.

RIPANS hotute tarlan danin, tunhnai khan Ministry of Health & Family Welfare chuan RIPANS, Mizoram hotute chu khum 50 awm theihna tur Critical Care Hospital, khum 100-a tihlen theih tur atan project siam turin thurawn a pe. Ministry of Health & Family Welfare vêk hian cheng vbc 350.59 sengin RIPANS tihchangtlun hna a thawk mek a, peihfel a nih hunah kum khata zirlai lakluh theih zat chu a lêtin a pung dawn a ni.

RIPANS tihchangtlun hna hi kumin December-ah thawh zawh beisei a ni a, project component zinga pakhat - khum 100 awmna damdawi-in erawh mamawhna a san avangin Union Health minister Dr Mansukh Manviya chuan kumin August thla ral hmaa zo turin a rawn hriattir a ni.

RIPANS hi India rama nursing, pharmacy leh paramedical sciences-te hmun khata zirna awm chhun leh Ministry of Health & Family Welfare-in a enkawl awmchhun a ni.

Inkawmnaah hian RIPANS director Dr Sanjay Dinkar Sawant, director hlui Dr H Lalrinmawia leh hotu dangte an tel.