Kan sorkar leh ngei dawn tih hi rinhlelh rual loh a ni - Zoramthanga

MNF president Zoramthanga chuan March 28, Thawhlehni khan Kolasib Diakkawn YMA Hall-ah MNF Block Confe-rence a hmanpuinaah thu a sawi a, "Inthlanpui lo awm leh turah MNF kan sorkar leh ngei dawn tih hi rinhlelh rual loh a ni," a ti.

Zoramthanga chuan, Mizoram inthlanpui awm turah Congress party chu beih tham an ni dawn lo nia sawiin, "An tlinna tur a váng hle a, an artelukàwn mai a hlauhawm hial. ZPM lah chuan inthlan hmasaka an intihîtawmna, Congress leh MNF ni lo an tih ṭhin te, unit system tihbo an tihte leh movement kan ni, an tihte kha a dik lohzia kan hmu ta vek a, îtawm thei ang bera an inzuar chung pawhin seat 10 pawh an la tling zo lo a ni," a ti a; ZPM-in bial tinah thu hnih neiin candidate pahnih/pathum an tiam zung mai niin a sawi.

Harsatna tam takin Mizoram sorkar a tlakbuak chungin chhungkaw ṭhahnem tak SEDP hmangin tuamhlâwm zel tur a nih thu sawiin Zoramthanga chuan, "Harsatna kára rorel tur hian Pathianin MNF a ruat ṭhin a ni," a ti.

Assam nena ramri buaiah sipai pakhat pawh hloh loin an inhnukdâwk (withdraw) lo nia sawiin Zorama chuan, "Withdraw tura min ngenna pawh, withdraw tur chuan CM aṭanga ka chawlh hmasak a ṭul thu ka sawi avangin nawr chi-ah min ngai lo," a ti a; ráltlân nawr kîr tura sorkar laipuiin nasa taka a nawrna pawisaloin MNF sorkarin an humhim niin a sawi.

MNF President chuan, Lunglei Muni-cipal Council inthlanah MNF-in sorkarna an siam ngei a rinawm thu a sawi bawk.

Inkhawmah hian Kolasib bialtu MLA K Lalrinliana pawhin thu a sawi a, "Pathianin kan CM finna leh remhriatna a pe a, kohhran leh tlawmngai pawlte nena ṭang tlángin harsatnate state dangte entawn tlak khawpa ṭhain kan hmachhawn thei a ni," a ti.

Conference-ah hian MNF zawm thar voter 662 lawm luh an nih thu MNF thuchhuah chuan a tarlang.