Sorkar sum chêt dan mak ti

PC party president Vanlalruata chuan nimin khan thuchhuah siamin, Mizoram sorkar sum chet dan mak a tih thu a tarlang.

Vanlalruata chuan thilmak leh mak lo chu a thlirtu a zir a nih thu sawiin, "Kan ram sum dinhmun hi mak ka tih fo laiin mak ti lo an awm. Kum 2020-21 a ral chiah, March 31, 2021 khàn Reserved Bank of India (RBI)-a Mizoram account-ah cheng khat mah awm loin cheng vbc. 123.35 indaih lohna kan nei (-123.35 cr). Hetianga RBI-a minus kan nei hi kum thara harsatna min siam chiamtu a ni ṭhin," a ti.

March 31, 2021 hian Mizoram sorkara sum khawihtu officer (drawing and disbursement officer) 709 zînga 285 chuan an savings/current account-ah pawisa tam tak tak an kawl nia sawiin PC President chuan, "Heng an kawl hi belhkhawmin cheng vbc. 456.59 a ni. Hetianga sum khawih kual hi thil hlauhawm tak, corruption kawngkhar zâu taka hawngtu a ni," a ti a, sorkar hian hetiang kal dan hi titawp se Mizoramin a ṭhatpui zawk a rin thu a sawi.