Champhai dist-ah kumin chhungin Rs 1,62,63,800 hû heroin man tawh

Champhai District Narco Coordination Centre (NCORD) Committee chu nimin khan an chairman James Lalrinchhana, district bawrhsap hoin DC Conference Hall-ah an ṭhukhawm. Kumin January 1 aṭanga nimin thlengin Champhaia Police leh Excise & Narcotics department ten Rs 1,62,63,800 hû heroin an man tih tarlan a ni.

Ṭhutkhawmah hian February 16, 2023-a ṭhutkhawma rorelte bawhzui dan thlirho a ni a, ruihhlo man zat leh thubuai ziah luh dinhmun sawiho a ni bawk.

Meeting-a tarlan danin, kumin January 1 aṭanga nimin thleng khan Champhai police-te'n NDPS Act, 1985 hnuaiah thubuai 20 an ziak lut a, chumi kaihhnawihah chuan mi 27 man niin, chu'ng zinga paruk chu ram dang mi an ni. Excise & Narcotics department-in NDPS Act hnuaiah thubuai 15 ziak lutin, a kaihhnawihah mi 21 an man a, chu'ng zinga mi panga chu ram dang mi an ni.

January 1 aṭanga nimin thlengin heroin hawng 524 (gram 6,305.96) an man a, chu chu tualchhunga hralhna angin

Rs 1,57,20,000 man a ni. Heroin an mannaah hian Assam Rifles nena thawhhona a awm nual.

January 1 - March 29 chhung vêkin END-in heroin gram 1,199 an man a, Rs 5,43,800 hû a ni. Heroin an mannaah Assam Rifles nena thawhhona a awm nual a ni.

Police leh END-te'n January 1 - March 29 inkara heroin an man zawng zawng chu gram 7,504 a ni a, Rs 1,62,63,800 man a ni. Heroin manah, ruihhlo chi dang an man nual bawk.

NCORD hi kum 2016-ah din a ni a; nimina ṭhutkhawmah hian NCORD convener Lalrinpuia Varte, SP Champhai leh member dangte an tel a ni.