Gutkha & tobacco product khap sawiho

National Tobacco Control Programme leh Food & Drugs Administration hotute chuan nimin khan Health Directorate conference hall, Dinthar Vengah Mizorama gutkha & tobacco product hrang hrang khap leh khuahkhirh chungchanga inràwnkhawmna, Consultative Meeting cum Training an buatsaih a, National Health Mission (NHM) mission director Dr Eric Zomawia'n a hmanpui.

He hun hi Directorate of Health Services (DHS)-a drugs controller and licensing authority Lalsawma Pachuau in a kaihruai a; Dr Eric Zomawia chuan, "Khawsak changkang zelah mihringte kan awm âwl tawh a, natna inkaichhâwn theih loh NCD in nasa takin min tibuai mek. Chutihlai karah heng thil belhchhah tura Mizote'n zuk leh hmuam bansan kan la harsat tlat mai hi thil pawi tak a ni," a ti.

Tunlai hian Mizo ṭhalai zingah vaihlo bakah, shikhar a hluar hle tih sawiin Dr Eric Zomawia chuan, "Shikhar kan tihte hian taksa a khawih pawi dan hi a nasa zual hle a, kan zavaia kan ṭhanharh a, nu leh pate pawhin chhungkuaah kan fate nasa taka zirtirna kan pek a, kan vil ngun a ngai lehzual a ni," a ti a, rampum huapa ṭhanharh a hun tawh tih a sawi.

Ṭhutkhawma tarlante

1. Gutkha product kan tih shikhar leh thil dangte hi India ram pumah siam chhuah khapna tihchhuah a ni tawh a; Food Safety & Standart Act. 2.3.4 - Prohibition and restriction on sale Regulation 2011 pawhin a phal lo.

2. Ei tur reng rengah taksa tana ṭha lo a awm tur a ni lo a, tobacco leh nicotine awmna a tel tur a ni lo.

3. Vaihhlo leh a kaihhnawih zuartute chu Rs 2,00,000 thleng chawitira hrem theih an ni a; IPC Section 271, 273, 188-ah te pawh hremna dan a awm.