Kum 2022-23 ah dan loa lâk luh meizial báwm 1,87,340 man a ni

Kum 2022-23 chhungin Mizoramah dan loa meizial (cigarette) lak luh báwm (pack) 1,87,340 man a ni a, cheng nuai 150 chuang hù a ni.

National Tobacco Control Programme leh Legal Metrology chuan nimin khan Administra-tive Training Institute (ATI) Conference Hall-ah Consultative Meeting cum Training an buatsaih. Legal metrology inspector Lalramchhana tarlan danin, kum 2022-23 chhungin Mizoramah meizial báwm 1,87,340 man niin, cheng nuai 150 chuang hù a ni a, a remchan angin Legal Metrology-in an tichhe ṭhin.

Lalramchhana chuan, kum 2015/2016 vel aṭangin nasa zawkin Mizoram district pangaah bul ṭan nan meizial tihrêm beihpui thlâk a nih thu sawiin, "A hnu kum hnih chhung 2016 - 2018 inkar ringawtah district pariatah cigarette pack 1,66,982 man a ni. Hei hian Mizorama dan loa cigarette hmanga sumdawnna a lian hle tih a tilang," a ti.

Ṭhutkhawmah hian, Mizoramah khauh zawka vaihlo khapna kenkawh dan tur te, dan loa meizial lak luh (contraband cigarette) tihtawp theihna atana ṭan lakho dan turte leh hmalaknate thlirho a ni a; NTCP legal consultant R Lalremruata'n vaihlo hman khapna dan leh vaihlo nghei duhte tana NTCP-in hma a lak dan a sawi a; NTCP legal consultant Vanlalzari'n COTPA leh a hnuaia dan hrang hrang a sawifiah.

Legal Metrology assistant controller Vanlalrema Hnamte-in 'Package Commodities Rules relating to Tobacco Control' tih thupui a sawi a; khawchhak lam aṭanga dan loa meizial lak luh zinga 60%-in Mizoram leh Manipur a paltlang thu leh Manipur aiin Mizoramah a kaltlang tam zawk thu a sawi a ni.