Lungsena vawk thi zingah ASF vei awm lo

Lunglei district chhung Lungsen khuaa tun hnaia vawk pùl hri, African Swine Fever (ASF) vanga thi nia rinhlelh vawk thite chu endik a ni a, ASF vanga thi a ni lo tih finfiah niin, ASF vanga vawk damlo emaw, thi emaw a awm rih lo.

Animal Husbandry & Veterinary department hotute chuan Vanglaini palai zawhna chhangin, tun hnai khan Lungsen khuaa vawk thite chu ASF vanga thi a nih leh nih loh endik a nih thu an sawi a, "Vawk thi sample lâk a ni a, laboratory pathuma kan endik hnuaah a negative vek a ni," an ti.

Lungsen khuaa vawk thite zingah ASF natna lan chhuah dan (symptom) a awm loh thu an sawi rualin, ASF hri chu a bo vek tawh tih theih a nih loh thu AH&Vety hotute chuan an sawi a, "Ran hri hi a lèn tawhnaah chuan a reh vek thei meuh lo a, rawn lan chhuah cháng a awm leh ṭhin," an ti a; ASF pawh vawk bakah sanghalin an put darh theih avangin khuahkhirha vèn sèn loh chin a awm theih thu an sawi a ni.