Lengpui Airport tan trolley thar lei tum mek; Restricted tender-in supply-tu tur zawn a ni
Lengpui Airport chei ṭhat hna thawh a nih hmain Lengpui Airport-ah passenger luggage trolley 200 vel a awm a, Airport chei ṭhatnaah hna thawktute'n trolley eng emaw zat an hman avangin January 2023 khan trolley hman tlâk 70 vel chiah a awm. Mizoram sorkarin trolley thar lei a tum mek a, restricted tender hmangin supply-tu tur zawn a ni.
RTI Act hmanga zawhna GAD Aviation Wing SPIO-in a chhàn danin, Lengpui Airport-a hman turin khualzinte bungraw nawrna luggage trolley 100 lei tum mek a ni a, chuta tan chuan cheng nuai 30.44 ruahman a ni. Supplier thlanna turin February 27, 2023-ah DPAB ṭhukhawm tawh mah se, supplier thlan a la ni lo.
GAD Aviation Wing SPIO chuan, luggage trolley petu (supplier) thlanna atan restricted tender chhuah a ni tih tarlangin, "Restricted tender chhuah niin, firm paruk, supply thei tura rinte hnenah quotation dil a ni. Open tender chhuah a nih loh chhan hi trolley indaih lohna a nasat avang leh a rang lama lei tum a nih vangin," a ti.
Zawhna chhannaa a lan danin, Lengpui Airport chei ṭhat hna thawh a nih hma, kum 2020 leh a hma lam khan luggage trolley 200 vel a awm laiin, February 2023-ah chuan trolley hman tlâk 70 vel chiah a awm. Airport chei ṭhatnaah hna thawktute'n bungrua leh hmanrua nawrna atan trolley an hmang ṭhin a, chu'ngah chuan 130 vel a chhia/bothlau tihna a ni.
Lengpui Airport-a trolley-te Airport chei ṭhat hna thawhnaa bungrua/hmanrua nawrna leh thiarna atan hman a nih chhan te, Airport/sorkar thuneitute'n hman an phalsak leh phalsak loh zawhna chhángin SPIO chuan, "Contractor-te'n anmahni thuin an lo hmang ve tawp a ni," a ti a; Airport-a luggage trolley-te chu GAD (Avation Wing) ta a nih thu leh, airport chei ṭhatnaah bungrua/hmanrua nawrna atan hmang tawh lo tura hriattir an nih tawh thu a tarlang.
GAD (Aviation Wing) SPIO chuan, Lengpui Airport-a trolley-te chu airport chei ṭhat hna thawktute hnenah hralh a nih loh thu leh, airport chei ṭhat hna thawktute chu luggage trolley an tihchhiat avangin pawisa chawitir turin hmalak mek a nih thu an tarlang bawk.