Thenzawl district a pian theih nan Vantawng YMA-in hmalak an rél

Vantawng Group YMA chuan nimin khan Police Traning School Branch, Thenzawlah group conference vawi 25-na an hmang a; Thenzawl district siam a nih theih nan hmalak an rél.

YMA, Vantawng Group Conference rorel hi an president Chawngsangliana'n a kaihhruai a; Thenzawl district a pian theih nan chak taka hmalak an rél a ni. Thenzawlah RD block a awm theih nana hmalak te, Vantawng Group YMA huam chhunga zirtirtu, mahni post ni loa thawkte an post ngeia thawk tura hmalakte leh, Thenzawlah Sub-Treasury Office a awm theih nana hmalakte an rél bawk.

Vantawng Group YMA hian Vanva lui dung a thianghlimna tura hmalak te, YMA branch hrang hrangte faina lama inelna buatsaih te, ruihhlo donaah chak zawka hmalakte leh environment humhalh kawnga hmalakte an rêl bawk a ni.

Vantawng Group-ah hian Thenzawl khaw chhung YMA branch pakua bakah, Neihloh, Buangpui, Kànghmun South leh Zote South branch-te an awm a; member 6,755 awm mekin, mipa 3,674 leh hmeichhia 3,081 an ni.