KHAWTHLIR

NSS-in thisen pe

Pachhunga University College NSS unit leh Red Ribbon Club-te chuan nimin khan Civil Hospital, Aizawl leh ZMC-ah thisen pek huaihawtin, thisen unit 137 an pe a; Civil Hospital blood bank-ah mipa 60 leh hmeichhia 16-in an pe a, ZMC blood bank-ah mipa 36 leh hmeichhia 25-in an pe a ni. Hrangbana College NSS unit chuan March 29, Nilaini khan Civil Hospital, Aizawl tan thisen unit 150 an pe bawk a, petute mipa 103 leh hmeichhia 47 an ni.

Combat uniform khuahkhirh a ni

Lunglei DC Ramdinliani chuan, Indian Army combat uniform (camouflage design) thar chu sorkar laipuia Controller General of Patents, Design & Trade Marks-in Indian Army-te hâk tur bika an ruahman (register) a nih avangin, mipui tan siam, zawrh leh hralh phal a nih loh thu a tarlang. Phalna nei loa Army combat uniform (camouflage design) hmangtute chu thubuai siamsak theih a ni.

MLA-in hawng

Serlui bialtu MLA Lalrinsanga Ralte chuan nimin khan Saiphai Panchayat Bhawan (VC house) a hawng. VC House hi RGSA scheme hnuaiah Rs 10,00,000 hmanga sak a ni a, ft. 24X12-a zau a ni. MLA Lalrinsanga hian nimin khan ama sum Rs 4,00,000 sénga mi harsate in hmun tur a lei a tlawh bawk.

Buhtun thatna zir

Women & Child Development, Serchhipa Child Development Project Office leh District Agriculture Office-te chuan nimin khan Serchhipa Agriculture department meeting hall-ah millets (buhtun) leh a kaihhnawih chaw ṭha ei tam a ṭhatzia inzirtirna an buatsaih a; anganwadi thawktute leh Serchhip College-a zirlaite an tel.

Kum 150-na lawm

Lungkawlh khua chuan nimin khan an khaw kum 150-na lawm pahin haw rûnpui an buatsaih a, Serchhip additional DC Lalmuansanga Ralte-in a hmanpui. Lalmuansanga Ralte chuan, ṭhalaite tan social media hman thiam a pawimawh thu te, zu leh ruihhlo ṭhat lohzia inzirtirna, sex education leh zirna lamah ṭan lak a ṭul thute a sawi.

SWTA pisa tlawh

Social Welfare & Tribal Affairs (SWTA) minister Lalrinawma chuan nimin khan SWTA pisa a tlawh. Minister hian thawktute nen an inkawmnaah thu sawiin, "Eng hna pawh thawkin nihna sang tak chelh pawh ni ila, mi dang tan malsawmna nih hi a hlu," a ti a, bung thar kai turin thawktute a sawm a ni.

Kawng khàr dawn

Meidum leh Hortoki inkar kawng chu thawm ṭhat a nih dawn avangin April 1-30, 2023 chhungin chawlhkar tin Thawhṭanni leh Zirtawpni inkarah lirthei tlàn theih lohin khàr a ni dawn a, Inrinni leh Pathianni-ah hawn ṭhin a ni ang.

DFDO pisa hawng

Hnahthial District Fisheries Development Officer (DFDO) pisa thar chu nimin khan bialtu MLA Dr R Lalthangliana, minister-in a hawng a, Fisheries minister K Lalrinliana pawh a tel. Hnahthial DFDO pisaah hian thawktu pali an awm dawn a ni.